तमू धीं दक्षिण कोरियाले “ङ्योई ताँ भर्चुअल तमू संवादमा हामी” कार्यक्रम गर्ने भएको छ । संस्थाले आफ्नो वार्षिक कार्ययोजना अन्तर्गत यही अप्रिल ९ तारिकबाट पहिलो भागको शुरुवात गर्दै श्रृंखलाबद्ध रुपमा फरक फरक विषयमा विभिन्न अतिथि वक्ताहरुलाई आमन्त्रित गरी जूम भर्चुअल मार्फत उक्त कार्यक्रम सञ्चालन गर्ने भएको हो ।
उक्त संवाद श्रृंखलाको पहिलो भाग अन्तर्गत स्वदेश फिर्तीपछिको सम्भावना र चुनौती विषयमा श्रोत व्यक्तिहरु पूर्व योजना आयोग परिषद सदस्य डा. गणेश गुरुङ, मुक्तिनाथ विकास बैंकका सहायक नायव सिईओ तिल बहादुर गुरुङ, नेपाली राजदूतावास सउल कोरियाका श्रम काउन्सिलर रमा भट्टराई, व्यवसायी तथा रिटर्निज विजय गुरुङसँग कार्यक्रम सहजकर्ता मञ्जु गुरुङले सञ्चालन गर्ने भएको छ । वक्ताहरुको प्रस्तुतिपछि सहभागीको जिज्ञासा र प्रश्नमा अन्तरक्रिया पनि गरिने भएकोले कार्यक्रम अझ रोचक र उत्कृष्ट बन्ने आयोजकले दावी गरेको छ ।
यस संवाद कार्यक्रमको उद्धेश्य तमू जातीको भाषा, लिपी, भेषभूषा, धर्म, संस्कार र संस्कृतिको संरक्षण, सम्बर्द्धन र प्रबर्द्धन गर्ने, विश्वभरका तमूहरुको एकता अझ मझबुत बनाउने मात्र नभएर देशको सर्वाङ्गगीण विकासमा टेवा पुर्याउने रहेकोले विभिन्न विधा, पेशा र क्षेत्रमा आबद्ध विज्ञ व्यक्तित्वहरुलाई जोड्दै समयको अनुकूलता बमोजिम कार्यक्रमको अवधि श्रृंखलाबद्ध निरन्तर अघि बढाईने कार्यक्रम संयोजक लेसन गुरुङले जानकारी दिए । संस्थाले तमू धीं दक्षिण कोरियाका केन्द्रीय अध्यक्ष लेसन गुरुङ संयोजक रहने गरी सन्तोष गुरुङ, मञ्जु गुरुङ, विजय गुरुङ, दर्पण गुरुङ, बोम्जन गुरुङ र प्रितम गुरुङ सहितको सात सदस्यीय कार्यदल गठन गरेको थियो ।
संस्था सम्बद्ध व्यक्तित्वहरुसँग आवश्यक छलफल, सुझाव र परामर्श गर्दै कार्यदल उक्त भर्चुअल संवादको तयारी गरेको हो । गौरवशाली इतिहास बोकेको तमू धीं दक्षिण कोरियाद्धारा आयोजित “ङ्योई ताँ भर्चुअल तमू संवादमा हामी” कार्यक्रमको प्रत्येक श्रृंखलालाई सफलतापूर्वक सम्पन्न गर्न सम्पूर्णमा सहयोगको लागी आयोजकले हार्दिक अनुरोध गरेको छ ।
