पोखरा, कात्तिक
आगामी मंसिर ४ गते हुने निर्वाचनमा बुढा उम्मेदवारलाई हराउनुपर्छ भन्दै देशव्यापी रुपमा ‘नो नट अगेन’ अभियान सञ्चालन भईरहेको छ । कास्कीमा पनि ठाउँठाउँमा यो अभियान सञ्चालन भईरहेको छ । यसको प्रभाव कास्की–१ को (१) मा पनि पर्न थालेको छ । सो क्षेत्रमा युवा नेता दीपक कोईरालालाई वान्स अगेन भन्दै स्वागत गरिएको छ । चुनावी अभियानका क्रममा रुपा गाउँपालिका वडा नम्बर ३ र ४ मा पर्ने नेपाल पाखा, थुम्का, पोल्याङटार, टाकञ्जा, फईचोक, आरुखर्क, खाल्टे, वायोडाँडा पुग्दा त्यहाँका स्थानियले कोईरालालाई वान्स अगेन भन्दै आगामी निर्वाचनमा जिताउने प्रतिबद्धता जनाएका हुन् ।
स्थानियले ३० वर्ष अघिदेखि एउटै व्यक्ति चुनाव लडिरहेको र जितेर केहि नगरेको तथा बुढो भईसक्दापनि युवालाई पालो दिनुको सट्टा पद ओगटिरहन चुनावी मैदानमा होमिएकाले त्यस्ता व्यक्तिलाई भोट नदिने बताएका थिए । ‘हामी राजनीतिमा पुस्तान्तरण भएको हेर्न चाहन्छौं । यसपटक बुढा उम्मेदवारलाई ‘नो नट अगेन’ भन्छौं । दीपकलाई वान्स अगेन भन्दै भोट हालेर जिताउँछौं’–उनीहरुको भनाई थियो । उनीहरुले आफूहरुको ठूलठूला माग नभएको बरु सडक, सिंचाई र खानेपानीजस्ता आधारभूत कुराको व्यवस्था गर्न आग्रह गरेका थिए ।
जवाफमा कोईरालाले आफूले रुपासहित आफ्नो क्षेत्रलाई विकास र समृद्धिमा अघि बढाएर त्यहाँको मुहार फेर्नका लागि भूमिका खेल्ने प्रतिबद्धता जनाएका थिए । उनले भने,‘आफूले विकासको सिन्कोपनि नभाँच्ने अनि प्रदेशले गरेका कामपनि मैले गरेको भनेर केहि व्यक्तिले प्रचार गरिरहेका छन् । तर प्रदेशबाट बजेट ल्याएर यहाँको विकासमा भूमिका खेल्ने म हो । अब अधुरा योजना पूरा गर्न फेरी एकपटक हजुरहरु सामु आएको छु ।’
कार्यक्रममा कांग्रेस सहमहामन्त्री जीवन परियारले स्थिरता, विकास र समृद्धिका लागि पाँचदलीय गठबन्धन बनाइएको बताए । उनले भने,‘चुनाव जित्नका लागि मात्र गठबन्धन बनेको होईन । देशको विकास, समृद्धि र स्थिरताको लागि बनेको हो ।’
कोणसभा अघि उम्मेदवार कोईरालाले रुपा गाउँपालिकाको टाकञ्जामा रहेको सहिद पार्कमा पुगेर सहिदहरुको शालिकमा माल्यार्पण गरेका थिए । सो अवसरमा बोल्दै सहिद बिजय बास्तोलाकी धर्मपत्नी देबी बास्तोलाले सहिदको सपना नभुल्न कोईरालालाई आग्रह गरेकी थिईन् ।
