राष्ट्रिय स्वतन्त्र पार्टी (रास्वपा) भित्र दुई सांसदको विवाद चुलिँदै जाँदा सभापति रवि लामिछाने ले कडा सन्देश दिएका छन्। उनले स्पष्ट शब्दमा भने, “जसलाई मालिक बन्नु छ, त्यसका लागि रास्वपा होइन, हामी सेवक हौं।”
सांसद खगेन्द्र सुनार र विश्वराज पोखरेल का अभिव्यक्ति र व्यवहार विवादमा आएपछि लामिछानेले तत्काल कारबाही नगर्ने संकेत दिएका छन्। उनका अनुसार दुवै घटनालाई पार्टीको अनुशासन आयोगले अध्ययन गरिरहेको छ।
खगेन्द्र सुनारको कडा अभिव्यक्तिबारे बोल्दै उनले दलित समुदायको पीडा र आवाज चर्को हुनु स्वाभाविक भएको बताए, तर मर्यादा भने सबैले पालना गर्नुपर्ने उल्लेख गरे।
त्यसैगरी, विद्यालयमा प्रधानाध्यापकलाई थर्काएको भिडियो भाइरल भएपछि विवादमा तानिएका विश्वराज पोखरेललाई भने उनले स्पष्ट रूपमा सचेत गराएका छन्। पोखरेलले सार्वजनिक रूपमा माफी मागेपछि अवस्था केही सहज बनेको पनि उनले बताए।
रास्वपा नेतृत्वले अब पार्टीभित्र अनुशासन र व्यवहारलाई कडाइका साथ लागू गर्ने संकेत दिएको छ।
