वर्षौंदेखि छाप्न बाँकी रहेका स्मार्ट सवारीचालक अनुमतिपत्र (लाइसेन्स) को १२ लाखप्रति छपाइ सम्पन्न भएको छ। सुरक्षण मुद्रण केन्द्र र यातायात व्यवस्था विभागबीच भएको पहिलो चरणको सम्झौताअनुसार छपाइ कार्य पूरा भएको हो।
केन्द्रका अनुसार छापिएका लाइसेन्स वैशाख १४ गते औपचारिक रूपमा सम्बन्धित निकायलाई हस्तान्तरण गरिनेछ। कार्यकारी निर्देशक देवराज ढुंगानाले दैनिक उच्च क्षमतामा छपाइ गर्दै १२ लाखप्रति कार्ड पूरा गरिएको जानकारी दिएका छन्।
अब दोस्रो चरणमा थप १७ लाखप्रति लाइसेन्स छपाइ गर्ने तयारी भइरहेको छ, जसका लागि सम्झौता पनि भइसकेको छ। असार मसान्तभित्र दोस्रो चरणको काम सम्पन्न गर्ने लक्ष्य राखिएको छ।
यसपछि साउन १ गतेदेखि लाइसेन्स छपाइको लामो समस्या अन्त्य हुने र रसिद बोकेर हिँड्नुपर्ने बाध्यता हट्ने केन्द्रले जनाएको छ। हालसम्म करिब २९ लाख लाइसेन्स छापिन बाँकी रहेको अवस्थामा ती सबै क्रमशः पूरा गर्ने तयारी छ।
विगतमा दैनिक २–४ हजार मात्र छापिने लाइसेन्स अहिले बढाएर करिब ४० हजार प्रतिदिनसम्म उत्पादन भएपछि लामो समयदेखिको समस्या समाधान हुने अपेक्षा गरिएको छ।
सरकारले यो सुधारलाई सेवा प्रवाहलाई छिटो, सहज र डिजिटल बनाउने महत्वपूर्ण कदमका रूपमा लिएको छ।
