सरकारले आर्थिक वर्ष २०९२/९३ सम्ममा कुल २४ हजार ५०० मेगावाट विद्युत उत्पादन गर्ने लक्ष्यसहित ‘ऊर्जा खपत वृद्धि तथा निर्यात रणनीति, २०८३’ सार्वजनिक गरेको छ। सरकारी, सार्वजनिक तथा निजी क्षेत्रको संयुक्त लगानीमा जलविद्युत् र सौर्य ऊर्जा परियोजनालाई प्राथमिकतामा राखिएको छ।
रणनीतिअनुसार बुढीगण्डकी जलाशययुक्त आयोजना १,२०० मेगावाट क्षमतासहित २०८१ भित्र सम्पन्न गर्ने लक्ष्य राखिएको छ। त्यस्तै, रघुगङ्गा जलविद्युत् आयोजना अन्तिम चरणमा पुगेको र छिट्टै सञ्चालनमा आउने जनाइएको छ। १४० मेगावाटको तनहुँ जलविद्युत् आयोजना २०८५/८६ सम्म सम्पन्न गर्ने योजना छ।
माथिल्लो अरुण (१,०६१ मेगावाट), नलगाड (४१७ मेगावाट), अरुण चौथो (४९० मेगावाट), बेतन कर्णाली (४३९ मेगावाट) लगायत ठूला आयोजना २०९०–२०९२ भित्र निर्माण सम्पन्न गर्ने लक्ष्य राखिएको छ। यसैगरी, दूधकोशी जलाशययुक्त आयोजना (६७० मेगावाट) पनि २०९१ सम्म सम्पन्न गर्ने कार्ययोजना छ।
सौर्य ऊर्जातर्फ नेपाल विद्युत् प्राधिकरणले १,००० मेगावाटको परियोजना २०८५ भित्र निर्माण गर्ने लक्ष्य राखेको छ। निजी क्षेत्र र इप्पानमार्फत करिब १४ हजार मेगावाट बराबरका सौर्य तथा निर्यातमुखी परियोजना अघि बढाइने छन्।
रणनीतिमा १४ आन्तरिक र १० अन्तरदेशीय प्रसारण लाइन निर्माण, विद्युतीय चुलो विस्तार, चार्जिङ स्टेशन स्थापना, कृषि तथा उद्योगमा विद्युतीय ऊर्जा प्रयोग वृद्धि लगायतका योजना पनि समेटिएका छन्।
सरकारले यो रणनीतिमार्फत देशलाई ऊर्जा उत्पादनमा आत्मनिर्भर बनाउँदै विद्युत् निर्यात गर्ने लक्ष्य लिएको छ।
