गुल्मी, ११ साउन २०८२ । गुल्मी जिल्लाको धुर्कोट गाउँपालिका-५, धुर्कोट अमराईमा शनिबार राति भएको आगलागीमा एक महिलाको मृत्यु भएको छ।
राति करिब ३:०० बजे मनिदेवी वि.क.को कच्ची घरमा आगलागी हुँदा उनकी ३० वर्षीया छोरी जुना वि.क.को ज्यान गएको जिल्ला प्रहरी कार्यालय गुल्मीका प्रहरी उपरीक्षक नारायणप्रसाद अधिकारीले बताए।
प्रहरीका अनुसार, ढुङ्गा र माटोले बनेको टिनको छानो भएको एक तले घरमा आगो लाग्दा जुनाको घटनास्थलमै मृत्यु भएको हो। उनी मानसिक रूपमा अस्वस्थ थिइन्।
आगलागीको समयमा घरमा रहेकी मनिदेवी वि.क. र उनका नातिहरू १२ वर्षीय श्रीधर वि.क. र ११ वर्षीय अरुण वि.क. भने सकुशल छन्। आगलागीको कारण अझै पत्ता लाग्न सकेको छैन।
बिहान ५:४५ बजे घटनाको जानकारी प्राप्त भएपछि प्रहरी चौकी धुर्कोटबस्तुबाट टोली खटिएको थियो। स्थानीयको सहयोगमा बिहान ६:३० बजे आगलागी नियन्त्रणमा लिइएको प्रहरीले जनाएको छ।
घटनाको विस्तृत अनुसन्धानका लागि इलाका प्रहरी कार्यालय पुर्कोटदहबाट प्रहरी निरीक्षक रेवन्त सेनको नेतृत्वमा टोली घटनास्थल पुगेको छ।
