१० असार, काठमाडौं। प्रधानमन्त्री पुष्पकमल दाहाल ‘प्रचण्ड’ र नेपाल भ्रमणमा रहेका चीनका उपविदेशमन्त्री सुन वेइतोङबीच सोमबार सिंहदरबारमा शिष्टाचार भेटवार्ता भएको छ।
भेटवार्तामा द्विपक्षीय हित, आपसी चासो, र सहकार्यका विषयमा छलफल भएको थियो। प्रधानमन्त्री दाहालले नेपालको आर्थिक सामाजिक विकासमा चीनले पुर्याउँदै आएको सहयोगप्रति खुशी व्यक्त गरे। साथै, सन् २०२६ सम्ममा अति कम विकसित मुलुकबाट स्तरोन्नति गर्ने नेपालका लक्ष्यलाई सफल बनाउन चीनको सहयोग आवश्यक रहेको बताए।
चीनका उपविदेशमन्त्री सुनले सन् २०२५ मा नेपाल–चीन कूटनीतिक सम्बन्धको ७० औँ वार्षिकोत्सवको अवसरमा ‘भिजिट नेपाल–२०२५’ मनाउने निर्णयको जानकारी दिए। यस अभियानले नेपालमा चिनियाँ पर्यटकको संख्यामा वृद्धि गर्ने अपेक्षा गरिएको छ। साथै, उनले नेपालको आर्थिक–सामाजिक विकासमा चीनले निरन्तर सहयोग गर्ने प्रतिबद्धता पनि व्यक्त गरे।
सुन नेपाल–चीन कूटनीतिक परामर्श संयन्त्रको १६ औं बैठकमा भाग लिन सोमबार नेपाल आएका थिए।
