काठमाडौं। पूर्वराष्ट्रपति विद्यादेवी भण्डारी एमालेको सक्रिय राजनीतिमा फर्कने चर्चा चलिरहेको बेला पार्टीभित्र दुईथरी प्रतिक्रिया देखिएको छ। एकथरीले भण्डारीको सम्भावित पुनरागमनलाई स्वाभाविक मानेर उत्साहित देखिएका छन् भने अर्कोथरीले यसलाई सहजै विश्वास गर्न नसकिने बताइरहेका छन्।
दुई कार्यकालमा झन्डै साढे सात वर्ष राष्ट्रपतिको जिम्मेवारी सम्हालेर २०७९ फागुन २९ गते शीतल निवास छाडेपछि बुढानीलकण्ठस्थित निजी निवासमा बस्दै आएकी भण्डारी, एमालेका विभिन्न कार्यक्रमहरूमा सहभागी हुँदै आएकी छिन्। यसले उनको सक्रिय राजनीतिमा फर्कने अड्कल बलियो बनेको छ।
पछिल्ला गतिविधिहरूले धेरैलाई भण्डारी केही समयभित्रै सक्रिय राजनीतिमा फर्कने विश्वास दिलाएको छ। यद्यपि, एमालेको सदस्यता नवीकरणबारे स्पष्ट जानकारी नभएको र पार्टी नेताहरूले यसलाई पुष्टि नगरेको जनाइएको छ। संगठन विभाग प्रमुख काशीनाथ अधिकारीले भण्डारीको सदस्यता नवीकरणको रिपोर्ट अझै नआएको बताए।
पार्टीका केही नेताहरूले भण्डारीको राजनीति गर्ने चाहना भए सदस्यता नवीकरण स्वाभाविक हुने बताउँदै यसलाई अनौठो मान्न नहुने धारणा राखेका छन्। एमाले पोलिटब्युरो सदस्य कृष्ण राईका अनुसार, भण्डारीलाई पार्टीमा ल्याउने प्रयासहरू भइरहेका छन्, तर यसबारे आधिकारिक छलफल नभएको बताएका छन्।
भण्डारीलाई अहिले नै सक्रिय बनाउँदा पार्टीमा स्पेसको समस्या हुने र केपी ओलीको आगामी कार्यकाललाई ध्यानमा राख्दै अहिलेको चर्चा अनावश्यक भएको विश्लेषण पनि गरिएको छ।
पार्टीका नेताहरूले भने भविष्यमा भण्डारीले सक्रिय राजनीतिमा आउने निर्णय गरेमा एमालेले स्वागत गर्ने बताउँदै अहिलेका चर्चाहरूलाई हल्ला मात्र भनेका छन्। भण्डारीको निजी सचिवालयले पनि हालसम्म केही निर्णय नभएको बताएको छ।
