२ असार, काठमाडौं। काठमाडौं महानगरका प्रमुख बालेन शाहले नेपाली कांग्रेस र नेकपा एमालेका वडाध्यक्षहरूलाई पार्टीको राजनीति नगरसभामा नल्याउन चेतावनी दिएका छन्।
आजका लागि तय गरिएको नगरसभा कांग्रेस र एमालेका वडाध्यक्षहरूले बहिष्कार गर्दा स्थगित भएपछि मेयर बालेनले सामाजिक सञ्जालमार्फत आक्रोश व्यक्त गरेका हुन्।
बालेनले लेखेका छन् कि तीन नेताका कारण १६० जना जनप्रतिनिधिको बोल्ने अधिकार हनन भएको छ। उनले भने, “नगरसभामा कोही पनि कुनै पार्टीको नेता र उपनेताका रूपमा रहँदैन। १६० जनाको नै हरेक निर्णयमा समान सहभागिता र स्वामित्व रहन्छ। बन्द कोठामा केही नेताले राजनीतिक लेनदेन गरेर सहमति गर्ने अनि सार्वजनिकरूपमा त्यसको औपचारिकता मात्रै दिने काम काठमाडौं महानगरपालिकाले गर्दैन।”
नगर प्रमुख शाहले काठमाडौं महानगरको कुनै पनि नीति, योजनाबारेमा छलफल बन्द कोठामा नहुने उल्लेख गर्दै नगरसभा प्रत्यक्ष प्रसारण हुने जानकारी दिए।
आजको नगर सभाको बैठकमा न्युरोडलाई ‘नो भेइकल जोन’ बनाउने छलफलको एजेण्डा थियो। यसै एजेण्डामा असहमत कांग्रेस र एमालेका वडाध्यक्षहरूले नगर सभाको बैठक बहिष्कार गरेका हुन्।
