साउथ, कोरिया
बोम्जन गुरुङ
अनेसास कोरिया च्याप्टरको आयोजनामा हाइकु विशेष अन्तरक्रिया कार्यक्रम जूम प्रविधिको भर्चुअल माध्यमबाट सम्पन्न भएको छ । नेपाली हाइकु साहित्यका वरिष्ठ साहित्यकारद्धय रामकुमार पाँडे, पुष्कर लोहनीलगायत अन्य अतिथि साहित्यकारहरू पुरू सुवेदी, कृष्ण बजगाईं, प्रकाश पौडेल माइलाको आतिथ्यतामा सम्पन्न भएको हो ।
नेपाली साहित्यमा हाइकु सम्भावना र भविष्य विषयक अन्तरक्रिया कार्यक्रममा अतिथि स्रष्टाहरूले नेपाली लेखक र पाठकमा हाइकुले गहिरो छाप बनाउँदै गएको, सैद्धान्तिक बहस पनि बाक्लिदै गएको र पुस्तकहरू पनि प्रकाशित हुँदै गएको जनाए । कार्यक्रममा वरिष्ठ साहित्यकार रामकुमार पाँडेले नेपाली साहित्यमा हाइकु लेखनको सान्दर्भिकता र इतिहासबारे स्पष्ट पारे भने त्यसैगरी अर्का वरिष्ठ साहित्यकार पुष्कर लोहनीले नेपाली हाइकुको इतिहास केलाउँदै विगतमा आफूले नियमित हाइकु वाचन कार्यक्रम गर्दै गराउँदै आएको सम्झिए ।
सो कार्यक्रममा साहित्यकार कृष्ण बजगाईले हाइकुको सैद्धान्तिक पक्षलाई बिर्सनु नहुने जनाए । हाइकु प्रशिक्षण गर्दै आएका अर्का साहित्यकार पुरू सुवेदीले प्रविधिको माध्यमबाट भविष्यमा हाइकुको विकास र विस्तारमा पहल गर्न सकिने जिकिर गरे । वर्ल्ड हाइकु एसोसियनका सदस्यसमेत रहेका अनेसासका केन्द्रीय अध्यक्ष प्रकाश पौडेल माइलाले हाइकुको सैद्धान्तिक पक्ष केलाउँदै पछिल्लो समय हाइकुले फड्को मार्दै गएको र डायस्पोरामा रहेका नेपालीहरू माझ पनि लोकप्रिय हुँदै गएको बताए । सोही अवसरमा नेपाली हाइकुको इतिहासमा लामो समयदेखि हाइकु लेखन, प्रशिक्षण, अनुसन्धान लगायतका माध्यमबाट योगदान गर्नुहुने पाँच स्रष्टाहरूलाई कोरिया च्याप्टरले सम्मान गरेको थियो ।
च्याप्टरले यसअघि गजल विशेष अन्तर्क्रिया र बालसाहित्य विशेष अन्तर्क्रिया गरिसकेको छ भने कविता विशेष र साहित्यिक पत्रकारिता विशेष अन्तरक्रियाको तयारीमा रहेको जनाएको छ । उक्त अन्तरक्रिया कोरिया च्याप्टरका अध्यक्ष एवम् कार्यक्रम संयोजक प्रमोद सारंगको सभापतित्वमा सम्पन्न भएको थियो । च्याप्टरका वरिष्ठ उपाध्यक्ष डीआर न्यौपाने ‘सूर्य’ले कार्यक्रम सञ्चालन गरेका थिए भने महासचिव ह्यारी बोण्डले स्वागत मन्तव्य राखेका थिए ।
