मुस्ताङमा पछिल्लो डेढ महिना देखि शल्यक्रिया सेवा बन्द हुँदा सर्वसाधारणले सास्ती खेप्न बाध्य भएका छन् । जिल्ला अस्पतालमा रहेका विशेषज्ञ चिकित्सको सरुवा भए पछि अर्को व्यवस्था हुन नसक्दा समस्या भएको हो । विगत आठ महिनादेखि कार्यरत रहनुभएका नवौं तहका एमडिजिपी चिकित्सक डा. मुखिया घलेको सरुवा भएसंगै मुस्ताङ अस्पतालमा शल्यक्रिया सेवा बन्द भएको हो । मनाङ अस्पतालबाट मुस्ताङ आउनुभएका डा. घलेको सरुवा भए सँगै मुस्ताङमा शल्यक्रिया गर्ने डाक्टरको अभाव भएको हो ।
मुस्ताङ अस्पतालका निमित्त मेडिकल सुपरीटेण्डेन्ट डा.तेजस नेपालले भन्नुभयो–‘चिसो मौसम अनि अहिले जिल्लाबाहिरका पर्यटकहरुको बढ्दो चापको समयमा विशेषज्ञ डाक्टर नहुँदा निकै समस्या भएको छ ।’ दुई वर्षीय दुर्गम सेवा प्रावधान अनुरुप मुस्ताङ अस्पतालको पहलमा डा घले मुस्ताङ अस्पतालमा आउनुभएको थियो । नेपाल सरकारको छात्रवृत्ति सुविधाबाट अध्ययन गर्नुभएका घले सरुवा भए पछि शल्यक्रियाका सबै सेवा बन्द भएको नेपालले बताउनुभयो ।
२०३१ सालमा स्थापना भएको मुस्ताङ अस्पताल स्थापना भएको ४८ वर्षपछि शल्यक्रिया सञ्चालनमा ल्याइएको थियो । सुरुवाती १५ शैय्याबाट सुरु गरिएको मुस्ताङ अस्पताल संघीयता पछि प्रदेश सरकारको मातहतमा २५ शैय्या अस्पतालको रुपमा स्तरोन्नती भएको हो । मुस्ताङ अस्पतालमा सामान्य अप्रेसन तथा प्रसुती शल्यक्रियाका लागि प्रदेश सरकारले आवश्यक एकुमेन्ट र तालिमहरु संञ्चालन गरेको थियो । यद्यपी शल्यक्रिया संञ्चालनमा आएको दुई वर्ष नपुग्दै पटक÷पटक सेवा अवरुद्ध हुदै आइरहेको छ । मुस्ताङ अस्पतालमा उपकरणको व्यवस्था भएपनि चिकित्सक नहुँदा भिडियो एक्सरे सेवा पनि प्रदान गर्न असहज भएको छ ।
चिकित्सक नहुँदा अप्रेसन सेवा रोकिएको छ, ल्याउनका लागि प्रयास भएको भए पनि ल्याउन नसकेको जानकारी आफूले पाएको जिल्ला समन्वय समिति मुस्ताङका उपप्रमुख आइतेलाल थकालीले बताउनुभयो । उहाँले भन्नुभयो–‘दुर्गम ठाउँमा दक्ष चिकित्सक नहुँदा बिरामीले धेरै खर्च गरेर उपचारका लागि अन्यत्र जानु पर्ने बाध्यता भएको छ ।’
मुस्ताङ अस्पतालका डार्करुम अधिकृत भोजराज रेग्मीले जनशक्तिका कारण सेवा दिन कठिन भएको बताउनुभयो । उहाँले भन्नुभयो–‘अस्पतालमा आउने बिरामीहरुलाई सेवा दिन मन त हुन्छ तर दक्ष तथा विशषज्ञ नै नहुँदा चाहेर पनि सेवा दिन सकिदैन, अनि बाहिर रिफर गर्नुको विकल्प हुँदैन ।’ भौगोलिक विकटताका कारण मुस्ताङमा दक्ष र अनुभव प्राप्त चिकित्सक बस्न नचाँहादा अस्पतालको शल्यक्रिया सेवा अवरुद्ध हुन पुगेको जोमसोमका व्यवसायी अमृत सुवेदीले बताउनुभयो ।
