नेपाल उद्योग वाणिज्य महासंघका अध्यक्ष चन्द्रप्रसाद ढकालले निराशालाई आशामा बदल्न उद्योगी व्यवसायीलाई आग्रह गर्नुभएको छ।
उहाँले मुलुकको खस्किँदो अर्थतन्त्रका कारण पछिल्लो समय उद्योगी व्यवसायीमा निराशा उत्पन्न भएको बताउँदै देशभित्रै देखिएका सम्भावनालाई अवसरमा बदल्न पनि आग्रह गर्नुभयो।
बुटवल उद्योग वाणिज्य संघ रुपन्देहीको ७०औं वार्षिक साधारणसभा तथा २५औं अधिवेशनको उद्घाटन गर्दै अध्यक्ष ढकालले नेपालमा प्रशस्त सम्भावना रहेको र ती सम्भावनालाई अवसरमा बदल्न आग्रह गर्नुभएको हो।
‘मैले त जताततै सम्भावना मात्रै देखेको छु। हरेक पहाडका डाँडामा सम्भावना देखेको छु, कुना कन्दरामा सम्भावना देखेको छु,’ उहाँले भन्नुभयो, ‘यी सम्भावनालाई अवसरमा बदलौं। विदेश जाने प्रवृत्ति बढेको छ, त्यसलाई निरुत्साहित गरौं।’
ढकालले आफूले शून्यबाट सुरु गरेर व्यावसायिक घरानाको नेतृत्व गरेको बताउँदै सम्भावनाको पहिचान गर्न नसक्दा नयाँ अवसर सिर्जना गर्न नसकिएको भनाइ राख्नुभयो।
आफ्नै नेतृत्वमा ट्रंक लाइन समस्या समाधानको पहल भइरहेको जानकारी गराउँदै ढकालले वैश्विक मन्दीका कारण नेपालमा पनि समस्या देखिएकाले अर्थतन्त्र विस्तारै लयमा फर्किने विश्वास व्यक्त गर्नुभयो।
बुटवल उपमहानगरपालिकाका नगरप्रमुख खेलराज पाण्डेयले बुटवलको विकासका लागि बुटवल उपमहानगरपालिका बुटवल उद्योग वाणिज्य संघसहित निजी क्षेत्रसँग सहकार्य गर्न चाहेको बताउनुभयो।
त्यस्तै मोतीपुर औद्योगिक क्षेत्र निर्माणको कामलाई अगाडि बढाउन सबै मिलेर काम गर्नुपर्ने भन्दै उक्त औद्योगिक क्षेत्र निर्माण हुन सकेमा कम्तीमा पनि २ सय उद्योग स्थापना गर्न सकिने बताउनुभयो। ‘जतिसक्दो चाँडो यो काम गर्न सकियो भने बुटवलबाट औद्योगिक विकासको राम्रो सन्देश प्रवाह गर्न सकिन्छ,’ उहाँको भनाइ थियो।
कार्यक्रमकै अवसर पारी बुटवल उद्योग वाणिज्य संघले प्रदान गर्ने आर्थिक पत्रकारिता पुरस्कार पत्रकार सञ्जु पौडेललाई प्रदान गरेको छ। पुरस्कारको राशि २५ हजार रुपैयाँ रहेको छ।
