सर्केगाड गाउँपालिका स्थित इलाका प्रशासन कार्यालय डेढ महिनादेखि बन्द हुँदा सेवाग्राही मर्कामा पर्दै आएका छन् । कार्यालयमा कर्मचारी नभएकाले ताजाँकोट, अदानचुली, सर्केगाड र चंखेली गाउँपालिकाका नागरिकहरू यतिखेर कार्यालयमा पुगेर रित्तो हातमा फर्कन बाध्य भएका हुन् ।

गत साउन १६ गतेदेखि उक्त कार्यालयमा कर्मचारी नभएपछि सेवाग्राहीका कामकाज प्रभावित हुनुका साथै स्थानीय नागरिकले नागरिकता बनाउन समेत पाएका छैनन् । अदानचुली गाउँपालिका–२ तुम्चका भक्त कुलालाले भाई बुहारीको नागरिकता बनाउन नपाउँदा आफूहरू रित्तै फर्कनु परेको गुनासो गर्नुभयो । तुम्च गाउँबाट झन्डै नौ घण्टा हिँडेर सर्केगाड आउदा पनि सो इलाका प्रशासन कार्यालयमा कर्मचारी नहुँदा सेवाग्राहीले सास्ती खेप्नु परेको हो ।

गाउँबाट गाउँपालिका केन्द्रमा रहेको इलका प्रशासनमा पुग्दा कम्तीमा पनि दुई–तीन हजार खर्च हुने गर्दछ । तर पनि कर्मचारी नहुनु सरोकारवाला निकायको लापरबाही भएको हो । जसका कारण नागरिकता समेत नबन्दै घर फर्कनु परेको उहाँको भनाइ छ ।

कर्मचारी नहँुदा आफू जस्तै धेरै जना सेवाग्राही रित्तै घर फर्केको गुनासो गर्नुभयो । नागरिकता बनाउनका लागि मात्रै सदरमुकाम सिमकोट पुग्न तीन दिन लाग्छ । पहिरोले भत्काएको बाटो सहज छैन । विकल्पमा इलाका प्रशासन भए पनि कुनै काम हुँदैन । सर्केगाडको लागि गाउँपालिकाबाट सिफारिस ल्याएका उहाँले सिमकोटबाट नागरिकता लिन पुनः अर्को सिफारिस चाहिने भन्दै कार्यालय प्रति आक्रोश पोख्नु भएको छ ।

नागरिकता बनाउन सर्केगाड पुगेर खाली हात घर फिर्ता हुँदाको दुःख ताजाँकोट गाउँपालिका–३ मासपुरका केशबहादुर रोकायाले पोख्नु भएको छ । ‘इलाका प्रशासन कार्यालयबाट नागरिकता बन्छ भनेर सर्केगाड पुग्दा कार्यालय बन्द थियो । खर्च मात्रै भयो, नागरिकता बनेन उहाँले गुनासो गर्नु भयो ।

इलाका प्रशासन कार्यालय सर्केगाडका कामु प्रमुख भीमबहादुर रोकायाको काज अवधि साउन १६ गते सकिएपछि उहाँ सदरमुकाम सिमकोटमा रहेको जिल्ला समन्वय समितिको कार्यालयमा समन्वय अधिकारीका रुपमा काम गर्दै आउनु भएको छ ।

सो विषयमा प्रमुख जिल्ला अधिकारी श्रीनाथ पौडेलसंग बुझ्दा उहाँले सहायक प्रमुख जिल्ला अधिकारी अमृत प्रसाद सुवेदीलाई इलाका प्रशासन कार्यालयमा कार्यालयमा खटाइएको थियो । तर सुवेदी भदौ १ गतेदेखि ७ गतेसम्म मात्रै इलाका प्रशासनमा हाजिर भएर जिल्ला फिर्ता भएको बताउनुभयो । यसका लागि अब छिटै कर्मचारी खटाइने र सेवाग्राहीलाई सेवा दिने प्रमुख जिल्ला अधिकारी पौडेलको भनाइ छ ।