राष्ट्रपति रामचन्द्र पौडेलले संविधान दिवसको अवसरमा टिकापुर घटनामा संलग्न चार जना सहित ६ सय ७० जनालाई भुक्तान हुन बाँकी रहेको कैद कट्टा गरी आममाफी दिनुभएको छ ।
राष्ट्रपति कार्यालयका प्रवक्ता शैलजा रेग्मी भट्टराईले ०८० असोज २ गते विज्ञप्ति जारी गर्दै भिम बहादुर खवास लगायत ४ सय ९७ जना, हर्क बहादुर लिम्बु लगायत १ सय ७० जना र ज्येष्ठ नागरिक सहन्दीन मियाँ भनिने सम्दीन मियाँ लगायत तीन जना गरी ६ सय ७० जनाको भुक्तान हुन बाँकी कैद सजाय माफी भएको जानकारी दिनुभएको हो ।
राष्ट्रपति कार्यलयले फौजदारी कसुर (सजाय निर्धारण तथा कार्यान्वयन) ऐन २०७४ को दफा ३७, कारागार नियमावली २०२०, को साविकको नियम १ र १ (क) तथा ज्येष्ठ नागरिक ऐन २०६३, को दफा १२ का आधारमा कैदीको सजाय माफी गरेको जनाएको हो ।
राष्ट्रपति पौडेलले कैद सजाय माफी दिनुभएका कैदीमध्ये टीकापुर घटनामा दोषी भई कैलाली कारागारमा रहेका तीन जना र पोखरा सुधार गृहमा रहेका एक नाबालक पनि रहेका छन् । टीकापुर घटनामा अदालतबाट दोषी भई कैलाली कारागारमा रहेका टीकापुर नगरपालिका-४, ठाह्रापुरका वीरबहादुर चौधरी, जानकी गाउँपालिका-७, मोतीपुरका हरिनारायण चौधरी र जानकी गाउँपालिका-७, लट्कनियाका प्रदीप चौधरी रिहा भएका हुन् । उनीहरू टीकापुर घटना मुद्दामा आठ वर्षदेखि कैदी जीवन भोग्दै आएका थिए ।
राष्ट्रपति पौडेलले टीकापुरमा भएको थरुहट आन्दोलनको घटनामा तीनै तहका अदालतबाट जन्मकैदको सजाय सुनाइएका रेशमलाल चौधरीलाई राष्ट्रिय गणतन्त्र दिवसको अवसरमा जेठ १५ गते कैद सजाय माफी मिनाह गर्नुभएको थियो ।
