वीरगंज महानगरपालिका–४ को बिर्तास्थित बाल सुधार गृहमा भदौ २६ गते राति खानाको विषयलाई लिएर विवाद हुँदा झडप भएको छ । झडपमा नौ जना बालक र तीन प्रहरी सहित १२ जना घाइते भएका छन् ।
भक्तपुरको बाल सुधार गृहबाट ल्याएका बालकहरूले राती बाल सुधार गृहका नाइकेसँग भएको विवाद तथा कुटपिटको घटनालाई लिएर सुधार गृहमा पहिलादेखि रहेका बालकहरू र भक्तपुरबाट ल्याएर राखिएका बालकहरूबिच विवाद भई झडप भएको हो । भक्तपुरको बाल सुधार गृहबाट भदौ ४ गते वीरगंज बाल सुधार गृहमा ल्याइएका १८ जना बालकहरू यहाँ नबस्ने भनि विरोध जनाउँदै आएको बाल सुधार गृहका प्रमुख टिका कृष्ण काफ्ले बताउनु भयो । उनीहरूले नै विवाद गर्दा झडप भएको उहाँको भनाई रहेको छ ।
झडपमा भक्तपुरबाट ल्याइएका मध्ये आठ जना समेत गरी नौ जना बालक र तीन जना प्रहरी घाइते भएको जिल्ला प्रहरी कार्यालयका एसपी कोमल शाहले जानकारी दिनु भयो । घाइते भएका सुधार गृहका नौ जना बालकलाई राति नै नारायणी उपक्षेत्रीय अस्पताल वीरगंजमा उपचार गराई जिल्ला प्रहरी कार्यालयमा ल्याएर राखिएको उहाँले बताउनु भयो ।
झडप तथा तोडफोड घटनालाई नियन्त्रणमा लिन नेपाल प्रहरी र सशस्त्र प्रहरीको टोली बाल सुधार गृह पुगेको थियो । तर, सुधार गृह भित्रबाट बालकहरूले ढुङ्गा मुढा प्रहार गरेर प्रहरीलाई अबेर रातिसम्म सुधार गृह भित्र प्रवेश गर्न दिएका थिएनन् । बाल सुधार गृहबाट प्रहार गरिएको ढुङ्गाले लागेर तीन जना प्रहरी समेत घाइते भएका छन् । स्थिति नियन्त्रणमा लिने क्रममा प्रहरीले केही राउन्ड अश्रु ग्याँस प्रहार गरेकोे थियो ।
प्रमुख जिल्ला अधिकारी हिरालाल रेग्मीले बाल सुधार गृहभित्रबाट बालकहरूले भदौ २७ गते पनि ढुङ्गा मुढा गरिरहेकोले इन्सेक मधेस प्रदेश कार्यालयलाई मध्यस्तताका लागी पहल गरिदिनु हुन आग्रह गर्नु भयो । बाल सुधार गृहमा रहेका बालकहरूका अनुसार सुधार गृहमा आफूहरूलाई बासी खाना दिएको, घरमा फोन गर्दा एक कलको १ सय रुपियाँ लिने गरेएको, एउटै कोठामा धेरै जनालाई कोचेर राखेएको, शौचालय पनि राम्रो नभएको, सुधार गृह प्रमुख टिका कृष्ण काफ्लेले यातना दिने गरेको आरोप लगाएका छन् ।
५० जनाको क्षमता रहेको बाल सुधार गृहमा भदौ ४ गते भक्तपुरको बाल सुधार गृहबाट ल्याएका १८ जनासमेत गरी हाल १ सय ४९ जना बालकहरू रहेका छन् ।
