चिकित्सकको लापरबाहीका कारण ६ वर्षीया बालिकाको उपचारको क्रममा भदौ ११ गते मृत्यु भएको छ । घटना पछि मृतक पक्षले गुल्मी अस्पताल, तम्घासमा आन्दोलन गरेका छन् । अर्घाखाँची जिल्ला छत्रदेव गाउँपालिका–७ भगवतीकी प्रसंसा मरासिनीको चिकित्सकको लापरबाही कारणले मृत्यु भएको भन्दै पीडित पक्षले अस्पतालमा आन्दोलन सुरू गरेका छन् ।
बालिकालाई पेट दुख्ने र बान्ता हुने समस्या भएपछि भदौ ११ गते गुल्मी अस्पताल तम्घासमा भर्ना गरिएको थियो । भदौ ६ बजे सुईबाट एण्टिबायोटिक दिएको केहिबेरमै छोरीको मृत्यु भएको बुबा राजेश मरासिनीले गुनासो गर्नुभयो । “सुई लगाउने बित्तिकै छोरीलाई अप्ठ्यारो भएपछि समयमा डाक्टरहरू नआएका कारण छोरीको अकालमा मृत्यु भयो ।” मृतकका बुवाले आरोप लगाउनुभयो । ‘चिया बिस्कुट माग्ने र हिडडुल गर्ने छोरीको सुई लगाएको १५ मिनेटमै मृत्यु भयो ।,’मरासिनीले भन्नुभयो ।
अस्पतालका निमित्त प्रमुख डाक्टर राजेन्द्रबहादुर जिसीले बालिकाको रिर्पोटहरू सबै सामान्य भएपनि बिहान एण्टिबाइटिक दिनेबित्तिकै थप समस्या देखिएर मृत्यु भएको स्वीकार गर्नुभयो । अस्पताल विकास समितीका अध्यक्ष गोपाल पाण्डेयले घटनाको सत्यतथ्य छानविन गरेर पीडितलाई न्याय दिनुपर्नेमा जोड दिनुभयो । नागरिक समाज गुल्मीका संयोजक पदम पाण्डेयले बालिकाको स्वास्थ्य थप गम्भिर समस्या देखिएपछि पनि डियुटीमा रहेका चिकित्सकहरूको लापरबाहीले मृत्यु भएको बताउनु भयो ।
रेसुंगा नगरपालिकाका मेयर खिलध्वज पन्थीले आन्दोलन भन्दा पनि बार्ता र सम्वादका माध्यमबाट सत्यतथ्य बाहिर ल्याएर बालिकाको परिवारसहित आम नागरिकको अस्पतालप्रतिको विश्वास कायम राख्नुपर्ने बताउनु भयो । जिल्ला प्रशासन कार्यालयमा सबै सरोकारवाला बसेर परिवार र अस्पतालसँग छलफल तथा छानविन समिति निर्माण गर्ने तयारीमा रहेको छ । अस्पतालमा तनाव सृजना भएका कारण अस्पतालको ओपिडी सेवा पनि बन्द भएको छ ।
