नेकपा माओवादी केन्द्रका अध्यक्ष एवं प्रधानमन्त्री पु्ष्पकमल दाहाल प्रचण्डले आफ्नो नेतृत्वमा सरकार बनेदेखि सुशासन, सामाजिक न्याय र समृद्धिको क्षेत्रमा उल्लेखनीय काम भएको दावी गरेका छन्।’मलाई अब राम्रो बाहेक अन्य गर्नु छैन। जीवनको उत्तरार्द्धमा राम्रो काम गरेर नेपाली जनताले सम्झिनेलायक काम गर्ने विचार छ,’उनले भने,’ अब ढुक्कसँग मर्ने मात्रै रहर छ ।’ प्रधानमन्त्री दाहालले नागरिकता विधेयक,मिटरब्याज पीडित, विद्युत व्यापार ,नक्कली भुटानी शरणार्थी प्रकरण,सुन तस्करी,ललिता निवास प्रकरण, सीमानाका लगायत विभिन्न जनसरोकारका विषयमा उल्लेखनीय काम भएको बताए। शुक्रबार वीरगन्जमा आयोजित समाजवादी मोर्चा नेपालको सन्देश सभालाई सम्बोधन गर्दै प्रधानमन्त्री दाहालले यिनै विषय नै सरकारको मुख्य एजेण्डा रहेको बताए।
उनले भने,’सरकारले गरेका कामबारे भन्न मानिसहरू किन डराउँछन् ? म त बुझ्दिनँ। प्रचण्डको हाइट बढ्छ कि भनेर डराउने गरेको हो ?’ गठबन्धनको नेतृत्वमा देशमा केही राम्रो हुने संभावना रहेको जिकिर गरे। राम्रो कामको थालनी भएकाले एकथरी मानिस आतंकित भएको उनको भनाइ छ। उनले प्रचण्ड नेतृत्वको सरकार ढाल्न गेम भइरहेको भन्दै यसमा आफू नडराउने बताए। उनले राम्रो काम गर्दा पनि आफूले जस नपाउने गरेको बताए। समृद्धिका निम्ति केही ठोस काम सुरू गरिए पनि सरकारले गरेका कामबारे भन्न मानिसहरू डराउने गरेको गुनासो गरे। माओवादीको अथवा प्रचण्डको हाइट बढ्छ कि भनेर डराउने गरेको हो कि भन्दै प्रश्न समेत गरे।
प्रधानमन्त्री दाहालले आफू गम्भीर भएर नै तस्करीको सुन बरामद गर्न सफल भएको दावी गरे। उनले जनताको पक्षमा राम्रो काम गर्दै आएको र आगामी दिनमा पनि जनताकै हितमा लाग्ने जिकिर गरे।
प्रधानमन्त्री दाहालले मोर्चालाई अगाडि लैजान सबैको सहयोग आवश्यक रहेको बताए।
