धार्चे गाउपालिका–७ लापुवेशीको प्रभातकिरण माध्यमिक विद्यालयकोे छात्रावासभित्र भदौ ४ गते चर्केपछि जोखिम बढेपछि विद्यार्थीलाई विद्यालयको कक्षाकोठामा सारिएको छ । एक साता देखि चर्किने क्रम सुरु भएपछि भदौ ५ गते छात्रावासको सामाग्री र विद्यार्थीलाई विद्यालयको एक, दुई र तीन कक्षा कोठामा सारिएको हो ।

कक्षाकोठामा छात्रावासको सामाग्री सारेपछि विद्यालयलाई पठन पाठनका लागि कक्षाको अभाव भएको विद्यालयका प्रध्यानाध्यापक जिव गुरुङले जानकारी दिनुभयो । उहाँका अनुसार छात्रावासमा दुई शिक्षक र ३४ विद्यार्थी बस्दै आउनुभएको थियो । ‘अहिले तीन ओटा कक्षामा छात्रावासको सामाग्री सारिएको छ, विद्यार्थीहरुलाई पढ्न कक्षा अभाव भएपछि इसिडि र कक्षा एक को विद्यार्थी एउटा कोठा र दुई र तिन कक्षाका विद्यार्थी एउटा कोठामा राखेर पढाइरहेका छौँ,’ उहाँले भन्नुभयो । लापुवेशिमै रहेको चार कोठे छात्रावास भवनको भुँइमा धाजाँ फाट्ने र गारोहरु चिरिएपछि जोखिम बढेर बस्न नमिल्ने बनेको उहाँले बताउनुभयो ।

लगातारको वर्षा पछि छात्रावास भवन चर्किएको हो । नयाँ छात्रावास भवन निर्माणाधिन रहेपनि ४५ प्रतिशत मात्र काम सकिएको उहाँको भनाई छ । छात्रावासमा चुमनुव्री र धार्चे गाउँपालिकाका विद्यार्थी बस्दै आएका थिए । विद्यार्थी राख्न अन्यत्र ठाउँ पनि नरहेको गुरुङले गुनासो गर्नुभयो । ‘अन्त राख्ने ठाउँ पनि छैन, अहिले जसोतसो विद्यालयमै व्यवस्थापन मिलाएका छौँ,’–उहाँले भन्नुभयो ।