तिला गाउँपालिका – ६ रुखेडास्थित देविमहादेव माध्यामिक विद्यालयमा साउन ६ गते आएको बाढीले क्षति पुर्याएपछि पठनपाठन प्रभावित भएको छ । विद्यालयमा बाढीले क्षति गरेपछि दुई दिनदेखि विद्यालय बन्द हुँदा पठनपाठन प्रभावित भएको हो । विद्यालय खोलाका किनारमा रहेकोले बाढीपहिरोको जोखिम रहेको क्षेत्र हो । प्रधानाध्यापक झुपे रावतका अनुसार ‘बाढीले विद्यालयको चारकोठे भवनमा क्षति पुगेको छ । त्यो भवनमा विज्ञानको ल्याव, कम्प्यूटर कक्षा र विद्यालयको कार्यालय रहेको थियो । भवनभित्रै बाढी पसेपछि बगाएर लिनुका साथै भिजेका छन् । भवन पनि भत्किएको छ । ’
ढिपु, सुडि र रिपीमा विद्यार्थीलाई पायक पर्ने गरी रुखेडामा ६ देखि १२ कक्षाको विद्यालय सञ्चालन गरिएको हो । तीन गाउँका कक्षा १० सम्मका २ सय २० जना र कक्षा ११ का ५० जना विद्यार्थी रहेका छ । प्रधानाध्यापक रावतका अनुसार ‘बाढीले विद्यालयका भौतिक संरचना क्षति गर्नुका साथै रिपी र सुडिदेखि विद्यालयसम्म आवतजावत गर्ने दुई वटा काठेपुल पनि बगेर गए । विद्यालयमा जान सकिने अवस्था छैन ।’ बाढीले केकति क्षति गर्यो । त्यहाँ पुग्न सकिएको छैन प्रधानाध्यापक रावतले भन्नुभयोे क्षतिको एकिन गर्न गाउँपालिका मुकाम रारालिहिस्थित प्रहरी चौकीलाई खबर गरिएको छ ।
तिला गाउँपालिका अध्यक्ष मोतीलाल रोकायाका अनुसार ‘अहिले तत्काल त्यही स्कूलमा पठनपाठन गर्न सक्ने अवस्था छैन । विद्यालय भरी बाढीले ढुंगा गिट्टी, बालुवा झारपात थुपारेको छ । विद्यालय जाने काठेपुल पनि बगिसकेका छैन । २/४ दिनमा खोलामा पानी घटेपछि विद्यालयमा जान सकिने सम्भावना छ । पानी परिरहेकोले जान सकिने अवस्था हुदैन । खोलामा पानी नघटेको खण्डमा त्यसका लागि केही वैकल्पिक उपाय गरेर पठनपाठन सुचारु गर्ने योजना छ । ’ उहाँले भन्नुभयो ।
