मध्यपुरथिमी नगरपालिका-२, सानोठिमी स्थित बालसुधार गृह तोडफोड गरेर ०८० भदौ ४ गते २ सय २१ जना ‘फरार’ भएका छन् । सुधार गृहभित्र आफूहरूलाई व्यवस्थापनले खानपिन, स्वास्थ्य परीक्षण राम्रो नभएको भन्दै भित्र रहेका बालबालिकाले सुधार गृहको पछाडि पट्टीको ढोका फोरेर भागेका प्रहरीले जनाएको छ ।
बलात्कार गरेको कसुरमा बालसुधार गृहमा रहेका रामेछापको मन्थली नगरपालिका-३, कठजोरका १९ वर्षीय कमल बस्नेतको भदौ ३ गते मृत्यु भएपछि बालसुधार गृहभित्र रहेका अन्य बालबन्दीहरू आफूहरूको हेरचाहमा ध्यान नदिएको भन्दै व्यवस्थापनसँग आक्रोशित भएका थिए । आक्रोशित अवस्थामा रहेका बालबालिकाहरूले सोही घटनालाई लिएर सुधार गृह तोडफोड गरेको पनि प्रहरीले जनाएको छ । जिल्ला प्रहरी परिसर, भक्तपुरका एसपी प्रजित केसीले बाल सुधार गृह तोडफोड गरेर फरार रहेका २ सय २१ जनामध्ये १ सय ९४ जनालाई काठमाडौँ उपत्यकाका विभिन्न ठाउँबाट नियन्त्रणमा लिइसकेको इन्सेकलाई बताउनु भयो । एसपी केसीका अनुसार फरार रहेका अन्य २७ जनाको खोजीका लागि काठमाडौँ, भक्तपुर र ललितपुर गरी तीन ओटै जिल्लामा प्रहरी परिचालान गरिएको छ ।
बालसुधार गृहभित्र प्रशासनले विभेद गरेको भन्दै बालबालिकाले नाराबाजी गर्दै घरेलु हतियार, ढुङ्गामुढासहित प्रहरी र सुधार गृह व्यवस्थापन गरिरहेको युसेप नेपालको कार्यालयमाथि ढुङ्गामुढा गरेको एसपी केसीले जानकारी दिनुभयो । बालबालिकाको आक्रमणमा परेर झडपका क्रममा १९ जना प्रहरी घाइते भएको एसपी केसीले उल्लेख गर्नुभयो । घाइते प्रहरीहरूको भक्तपुरस्थित मध्यपुर अस्पताल र नागरिक कम्युनिटी अस्पतालमा उपचार भइरहेको छ । त्यस्तै प्रहरीसँगको झडपमा परी १२ जना बालबालिका घाइते भएका एसपी केसीले इन्सेकलाई जानकारी दिनुभयो । घाइते भएका दुई जनाको उपचार राष्ट्रिय ट्रमा सेन्टर र अन्यको त्रिवि शिक्षण अस्पतालमा भइरहेको छ ।
