त्रिपुरासुन्दरी गाउँपालिका-२, चोकटीको गुवाँथली स्थित श्री गोल्माराजा आधारभूत विद्यालयमा अध्ययनरत १२ वर्षीय बालकलाई गृहकार्य नगरेको आरोपमा कुटपिट गरी यातना दिएको भन्दै ०८० भदौ २ गते विद्यालय व्यवस्थापन समितिले सोही विद्यालयका प्रधानाध्यापक रामानन्द शाहलाई बर्खास्त गरेको छ । पीडित बालकलाई प्रधानाध्यापक शाहले भदौ १ गते गृहकार्य नगरेको आरोपमा कक्षा कोठाभित्र लाठ्ठी प्रहार गरी यातना दिएको आरोप छ ।
प्रधानाध्यापकको कुटाइबाट घाइते बालकको खुट्टामा गहिरो चोट लागेको पीडितका बुबा राज थामीले बताउनु भयो । पीडितका बुबा राज थामीका अनुसार घाइते बालकको भदौ १ गते खाडीचौर अस्पतालमा उपचारको लागि लगेकोमा सो अस्पतालले धुलिखेल अस्पताल रिफर गरी भदौ २ गते धुलिखेल अस्पतालमा उपचारका लागि लगिएको छ । घटनापछि आरोपित शिक्षक शाह फरार भएको स्थानिय ध्रुवराज गुरुङले बताउनु भयो । प्रधानाध्यापक शाहलाई त्रिपुरासुन्दरी गाउँपालिकाले २४ घण्टे स्पष्टीकरण मागेको तर फरार रहेको गाउँपालिका अध्यक्ष भक्तध्वज बोहराले जानकारी दिनुभयो ।
बालकलाई कुटपिट गरी यातना दिएको आरोपमा भदौ २ गते बसेको विद्यालय व्यवस्थापन समितिको बैठकले आरोपित प्रधानाध्यापकलाई प्रधानाध्यापक पदबाट हटाउने, पीडित बालकको उपचार खर्च ब्यहोर्नु पर्ने सहितको स्पष्टीकरण माग गरेको विद्यालय व्यवस्थापन समितिका अध्यक्ष सागर गुरुङले बताउनु भयो । पीडित पक्ष कानुनी कार्बाहीको लागि प्रहरी कार्यालय जान तयारी भएकोमा आरोपित प्रधानाध्यापकले उपचार खर्च ब्यहोर्न तयार छु भनि टेलिफोनबाट बताएपछि हाल प्रहरी कार्यालय जान रोकिएको स्थानीय ध्रुवराज गुरुङले बताउनु भयो ।
