कागबेनीमा साउन २८ गते राती आएको बाढीले क्षति पुगेको बारागुङ मुक्तिक्षेत्र गाउँपालिका–४ कोे जनशान्ति माध्यमिक विद्यालयको पठनपाठन बन्द भएको छ । बाढीले भवनलगायतका भौतिक संरचनामा ठूलो क्षति पुर्याएकोले पठनपाठन बन्द भएको शिक्षक प्रेम गौतमले बताउनुभयो ।
१ सय ९० जना विद्यार्थीहरु आवासीय सुविधा सहित अध्ययन गर्ने जनशान्ति माध्यमिक विद्यालयको खेलमैदान, कक्षाकोठा र छात्रावास भवनमा क्षति पुगेपछि पठनपाठन अवरुद्ध भएको हो । गाउँपालिकाका प्रवक्ता एवम् वडा नम्बर १ का अध्यक्ष प्रमेश गुरुङले विद्यार्थीको पठनपाठन कहिलेबाट गर्ने कुनै टुंगो नरहेको बताउनुभयो ।
विद्यालय व्यवस्थापन समितिले बैठक बसेर २०८० भदौ ८ गते सम्म विद्यालयमा पठन पाठन गर्न सक्ने अवस्था नरहेकोले उक्त समय सम्म बिदा दिने र त्यस पछि अन्य विकल्पको बारेमा विचार गर्ने जानकारी दिएको मुस्ताङका प्रमुख जिल्ला अधिकारी अनुप केसीले बताउनुभयो ।
भवन र खेलमैदानमा बालुवा थुप्रिएको छ । बाटो पनि हिलाम्मे छ, आवासीय रूपमा सञ्चालन भएको विद्यालयमा खानेपानी, विधुत, खाद्यान्न र आवासको पूर्ण व्यवस्थापन नभएसम्म पठनपाठन सञ्चालन गर्न सम्भव छैन प्रवक्ता गुरुङले भन्नुभयो । बाढीले विद्यालयको साढे दुई रोपनी करेसाबारी र शिक्षकले आवासका रूपमा प्रयोग गरेको दुईकोठे भवन समेत भत्काएको छ ।
कागखोलामा आएको बाढीले जनशान्ति माध्यमिक विद्यालय, बारागुङ मुक्तिक्षेत्र गाउँपालिकाको ४ नम्बर वडा कार्यालय, प्रहरी चौकी, बैंक, धर्मशाला, गुम्बा, मन्दिर, सडक, पक्की पुल, झोलुङ्गे पुल तथा काठको अस्थायी पुल बगाएको थियो ।
