कञ्चनपुरको भिमदत्त नगरपालिका १८ का वडाध्यक्ष रविन्द्र प्रसाद देवकोटालाई कुटपिट गरेको आरोपमा राष्ट्रिय युवा संघका कार्यकर्ता कमल रोकाया, केशव चन्द, रोहितजङ्ग कुँवर, प्रविन बोगटी, र नविन चन्दका विरुद्ध पीडित पक्षले ०८० साउन २८ गते ज्यान मार्ने उद्योग अन्तर्गत जिल्ला प्रहरी कार्यालय, कञ्चनपुरमा उजुरी दिनु भएको छ ।

जिल्ला प्रहरी कार्यालयका डिएसपी प्रकाश डाँगीले वडाध्यक्षमाथि कुटपिट गरिको भन्दै आठ जना विरुद्ध ज्यान मार्ने उद्योगमा उजुरी परेको भए पनि घटनामा संलग्न व्यक्तिहरु फरार रहेकाले खोजी कार्य भइरहेको बताउनु भयो । जिल्लास्थित एमाले पार्टी कार्यालयमा साउन २७ गते आयोजित राष्ट्रिय युवा संघको १० औँ अधिवेशनका क्रममा मतदाता नामावली टाँस गर्नेसम्बन्धमा विबाद उत्पन्न भएपछि संघका नेता तथा कार्यकताहरुले अधिवेशन मण्डलका सदस्य समेत रहनु भएका वडाध्यक्ष देवकोटालाई कुटपिट गरी घाइते बनाएका थिए ।

कुटपिटबाट टाउँको, छाती र आँखामा गहिरो चोट लागि घाइते हुनु भएका वडाध्यक्ष देवकोटाको उपचार धनगढीस्थित माया मेट्रो अस्पतालमा भइरहेको र टाउँकामा गम्भिर चोट लागेकोले थप उपचारका लागि काठमाडौँ लैजाने तयारी भइरहेको पीडितकी आमा कमला देवकोटाले बताउनु भयो ।