नवलपरासी पूर्व नवलपुरमा ६ वर्षमा हराएका मध्ये १ सय ६९ मानिस अझै फेला पर्न सकेका छैनन् ।
जिल्ला प्रहरी कार्यालय नवलपरासी पूर्वको तथ्याङ्क अनुसार विगत ६ वर्षको अवधिमा जिल्लामा १ हजार ८ सय ५८ मानिस हराएका थिए । जसमध्ये गत असार मसान्त सम्ममा १ हजार ६ सय ८९ मानिस फेला परेको भएपनि अझै १ सय ६९ जना मानिस भने फेला नपरेको जिल्ला प्रहरी कार्यालय नवलपरासी पूर्वका प्रहरी उपरीक्षक भुवनेश्वर तिवारीले बताउनुभयो ।
प्रहरी उपरीक्षक तिवारीका अनुसार जिल्ला प्रहरी कार्यालयमा हराएको भनेर निवेदन आएका मध्ये आर्थिक वर्ष २०७४/०७५ देखि यता ६ वर्षको अवधिमा १ सय ६९ अझै फेला पर्न सकेका छैनन् । घरपरिवारले हराएका भनेर निवेदन दिएकाहरुमा कतिपय आफैं परिवारको सम्पर्कमा आउने र केही प्रहरीको संक्रियतामा खोजी गर्ने गरिएको छ । तर अझै पनि आफुँहरुको तथ्याङ्कमा १ सय ६९ जना हराएकै अवस्थामा देखिएको उहाँले बताउनुभयो ।
‘उनिहरु कतिपय परिवारको सम्पर्कमा आएर पनि हामीकहाँ फेला परेको सूचना नदिएको हुन पनि सक्छ, केही अझै अज्ञात रहेको हुन पनि सक्छ’ प्रहरी उपरिक्षक तिवारीले भन्नुभयो ।
हराएका मानिसको अवस्था पत्ता लगाउन अहिले सम्बन्धीत परिवारहरुलाई भेट्ने र यकिन गर्ने काम चलिरहेको उहाँको भनाई छ । कतिपयले घर सम्पर्कमा आएपनि प्रहरीलाई सूचना नदिँदा हराएको संख्या धेरै देखिने अवस्था हुने गरेकाले अहिले घर परिवार सम्पर्कमा नआएपनि आफूँहरुले खोज्ने र परिवारलाई भेट्ने काम गरिरहेको प्रहरी उपरीक्षक तिवारीले बताउनुभयो ।
प्रहरीको तथ्याङ्क अनुसार गएको ६ वर्षमा २ सय ९० पुरुष, १ हजार १ सय ३९ महिला, १ सय १० बालक र ३ सय १९ बालिका हराएका थिए । जस मध्ये २ सय ५० पुरुष, १ हजार ३८ महिला, १ सय ६ बालक र २ सय ९५ बालिका फेला परेका छन् । ४० जना पुरुष, १ सय १ जना महिला , ४ जना बालक र २४ जना बालिका अझै फेला परेका छैनन् ।
फेला पर्न बाँकी रहेको सँंख्या महिला, बालबालिकाको धेरै रहेको प्रहरी उपरीक्षक तिवारीले बताउनुभयो । हराएका भनिएका व्यक्तिको खोजतलासको काम र परिवारबाट अवस्था एकिन गर्ने काम जारी रहेको उहाँको भनाई रहेको छ । फेला पर्न बाँकी रहेका मध्ये गत आर्थिक वर्षको मात्रै हराएका ३ सय ८९ मध्ये अरु फेला परेको र ६७ जना फेला पर्न बाँकी रहेका छन् ।
