पोखरा,  साउन
गण्डकी प्रदेशसभाकी उपसभामुख विनाकुमारी थापाले आदिवासी समुदायको संस्कृति जोगाउन युवा पुस्तामा त्यसको हस्तान्तरण जरुरी रहेको बताउनुभएको छ ।

२९ औं विश्व आदिवासी दिवसका अवसरमा बुधबार बिहान शुभकामना सन्देश जारी गर्दै उपसभामुख थापाले आदिवासी जनजातिका संस्कृति, भाषा र भेषभूषा लोप हुँदै जान थालेको भन्दै चिन्ता व्यक्त गर्नुभएको छ । आदिवासी जनजाति समुदायको भाषा, संस्कृति र भेषभूषाले नेपाल सांस्कृतिक रुपमा समृद्ध बनेको उल्लेख गर्दै उहाँले आधुनिकता र सूचना प्रविधिको तीव्रतर विकासले आदिवासी जनजाति समुदायका परम्परागत भाषा, संस्कृति लोप हुने खतरा बढेको बताउनुभएको छ ।

आफ्नो मौलिक पहिचानप्रति युवा पुस्ताले गौरव गर्ने वातावरण निर्माण गर्नुपर्ने भन्दै उपसभामुख थापाले राज्यका हरेक निकायमा आदिवासी जनजाति समुदायको सम्मानजनक र न्यायोचित प्रतिनिधित्वका लागि आवश्यक नीति निर्माणमा ध्यान दिनु आवश्यक रहेकोमा जोड दिनुभएको छ । शुभकामना सन्देशमार्फत् उपसभामुख थापाले आदिवासी समुदायको मौलिक संस्कृतिको संरक्षण गर्न सरोकारवाला समुदाय र निकायको ध्यानाकर्षण समेत गराउनुभएको छ ।