पत्रकारलाई सामाजिक सञ्जालमा गाली गलौज गरेको आरोपमा बागलुङको जैमिनी नगरपालिका– ७ जैदी स्थायी घर भई हाल पर्वतको कुश्मा बजार बस्ने ३८ वर्षीय आरके अदिप्त गिरी भनिने रमेश थापा विरूद्ध पर्वतका पत्रकारले साउन २१ गते उजुरी दिएका छन् । आरोपित विरुद्ध पर्वत जिल्ला अदालतले साउन २२ गते सोमबार पक्राउ पुर्जी जारी गरेको छ ।
आरोपितले पर्वतमा क्रियाशिल पत्रकारहरुका विरूद्धमा पेशागत मर्यादा र सामाजिक प्रतिष्ठामा आँच आउने गरी नाम नै किटान गरेर असभ्य शब्द सहितका सामग्रीहरु सामाजिक सञ्जालमा राखेको भन्दै इन्सेक प्रतिनिधि सन्तोष थापा र पत्रकार गणेश पौडेलले विद्युतीय कारोबार ऐन २०६३ बमोजिम कारबाहीको माग गर्दै आरोपित विरूद्ध जिल्ला प्रहरी कार्यालय पर्वतमा उजुरी दर्ता गराउनुभएको थियो ।
उजुरीका आधारमा प्रहरीले प्रारम्भिक अनुसन्धान पछि सोमबार पर्वत जिल्ला अदालतबाट पक्राउ पुर्जी लिएको हो । आरोपितलाई विभिन्न माध्यमबाट खोजि कार्य भइरहेको जिल्ला प्रहरी कार्यालय पर्वतका प्रहरी नायव उपरीक्षक मधुसुदन न्यौपानेले जानकारी दिनुभयो । आरोपित अहिलेसम्म सम्पर्कमा नआएको प्रहरीले जनाएको छ ।
