इलामकाे सूर्योदय नगरपालिका–२ सयपत्रीकी ४५ वर्षीया डम्वरकुमारी तामाङको हत्यापछि पति फरार भएको प्रहरीले जनाएको छ । घरायसी विवादका क्रममा ५० वर्षीय पति पूर्णबहादुर तामाङले साउन २२ गते राती खुकुरी प्रहार गरी ४५ वर्षीया पत्नी डम्वरकुमारीको हत्या गरेको जिल्ला प्रहरी कार्यालयका डिएसपी प्रकाश जवेगुले बताउनु भयो ।
पाँचथरको फिदिम नगरपालिका–४ जोरसाल स्थायी घर भई सूर्योदय नगरपालिका-२ सयपत्री टोलीमा डेरा गरी बस्दै आएका पूर्णबहादुरले खुकुरी प्रहार गरी पत्नीको हत्या गरेको प्रारम्भिक अनुसन्धानका क्रममा खुलेको डिएसपी जवेगुले बताउनु भयो ।
पत्नीको हत्या लगत्तै आरोपित फरार भएको र खोजी थालिएको डिएसपी जवेगुको भनाइ छ । हत्या गरिएकी डम्वरकुमारी कान्छी पत्नी भनिए पनि जेठी पत्नीको बारेमा खोजी भइरहेको प्रहरीले जनाएको छ । शवको पोष्टमार्टम जिल्ला अस्पतालमा साउन २३ गते गर्ने तयारी गरिएको छ ।
