बर्दियामा रेबिजविरूद्धको एन्टी रेबिज भ्याक्सिन अभाव हुँदा बिरामीहरू मर्कामा परेका छन् । अनिर्वाय र निशुल्क भनिएको एन्टी रेबिज भ्याक्सिन विगत दुई महिनादेखि नहुदाँ बिरामीहरूले महङ्गोमा मूल्यमा मेडिकलबाट किनेर लाउन बाध्य भएका छन् ।
रेविज रोग कुकुर, बिरालो, न्याउरी मुसा, स्याल व्वांसो चमेराको टोकाईबाट लाग्ने रोग हो । रेबिज रोग शत प्रतिशत प्राण घातक रोग हो । यो रोग लागेपछि रोगको उपचार सम्भव हुदैन । गत आर्थिक वर्ष २०७९/०८० मा रेबिज रोग लागेर दुई जनाको मूत्यु भएको थियो । यसबाट बच्ने एक मात्र उपाय भनेको एन्टी रेबिज भ्याक्सिन हो । बर्दिया अस्पताल गुलरिया ,आर सी मेमोरियल नगर अस्पताल, बारबर्दिया, बासगढी नगर अस्पताल बासगढी, प्राथमिक स्वास्थ्य केन्द्र राजापुरमा रेबिज विरूद्धको भ्याक्सिन पाइने गरेको थियो ।
प्राथमिक स्वास्थ्य केन्द्रका मेडिकल सुपरिटेन्डेन्ट डाक्टर कृष्ण खनालले अस्पतालमा वार्षिक ५ सय भन्दा बढी बिरामी एन्टी रेबिज भ्याक्सिन लगाउन आउने गरेको जानकारी बताउनु भयो । उहाँले असार १४ गतेबाट भ्याक्सिन सकिएको र बजारमा पनि भ्याक्सिन अभाव भएको जानकारी बताउनु भयो । दैनिक ४/५ जनासम्म बिरामी भ्याक्सिन लगाउन आउने गरेको डाक्टर खनालले जानकारी दिनुभयो । डा. खनालका अनुसार स्वास्थ्य विभागले नपठाएको कारण भ्याक्सिन अभाव भएको बताउनु भयो ।
बर्दिया अस्पतालमा सूचना अधिकारी द्रोणविक्रम पन्थीले बर्दियामा अस्पतालमा १ हजार भाइल भ्याक्सिन आएको जानकारी बताउदै ०८० जेठ १८ गतेदेखि भ्याक्सिन नभएको र बिरामीले मेडिकलबाट खरिद गरेर ल्याएको भ्याक्सिन लगाउने गरेको बताउनु भयो । बासगढी नगर अस्पतालका डाक्टर प्रेम वलीले अस्पतालमा ४ सय भाइल भ्याक्सिन आएकोमा माघ २२ गतेबाट लगाउन थालिएकामा जेठ ३० गते भ्याक्सिन सकिएको बताउनु भयो ।
यसैगरी, आरसी मेमोरियल नगर अस्पतालका जनस्वास्थ्य निरिक्षक थीरबहादुर खड्काले अस्पतालमा आर्थिक बर्ष २०७९/०८० मा ५ सय ३० भाइल खोप आएको जानकारी दिनुभयो । उहाँले प्रति महिना ५० भाइलको दरले एन्टी रेबिज भ्याक्सिन खोप आउने गरेका थियो । तर जेठमा ३० भाइल भ्याक्सिन मात्र आएको र जेठ ११ गते नै खोप सकिएको जानकारी दिनुभयो । डाक्टर कृष्ण खनालले भ्याक्सिनका लागि प्रदेशमा माग गरेको भए पनि हालसम्म उपलब्ध हुन नसकेको बताउनु भयो ।
