पत्रकार उजिर मगरलाई सुन तस्करीमा गिरफ्तारीमा परेका दावा छिरिङ र उहाँकी पत्नी अमला रोक्काको बारेमा समाचार लेखेको भन्दै दावा र अमलाका आफन्तले ज्यान मार्ने धम्की दिएका छन् । मगरले साउन १६ गते लोकान्तर डट्कममा ‘सुन काण्डमा माओवादीका रोल्पाली नेतालाई टाउको दुखाई बनेकी थबाङकी अमला’ शीर्षकमा सुन तस्करीमा संलग्न भनी अनुसन्धानका लागि गिरफ्तार गरेका तिब्बतीयन मुलुकका बेल्जियन नागरिक दावा छिरिङ र सहिद पत्नी भनिएकी अमला रोक्काबारे समाचार लेख्नु भएको थियो ।
सोही समाचारको विषयलाई लिएर अनुसन्धानका लागि प्रहरी गिरफ्तारीमा परेका दावा छिरिङकी पत्नी अमला रोक्काकी बहिनी ज्वाइँ (बिन्दु बुढाका पति) बागलुङको ढोरपाटन नगरपालिका-४ का ४६ वर्षीय खगेन्द्र छन्त्याल, कमलाकी भाञ्जी दीपा श्रेष्ठ र दाई अमरले आफूलाई ज्यान मार्ने धम्की दिनुका साथै सामाजिक सञ्जालबाट बदनाम गर्ने काम गरिरहेको पत्रकार मगरले इन्सेक प्रतिनिधिलाई जानकारी दिनुभयो ।
आफूलाई विदेशमा रहेका केही व्यक्तिले सामाजिक सञ्जालमार्फत धम्की दिएको र छिरिङसँग नाता जोडेका खगेन्द्र छन्त्यालले आफूलाई ‘जहाँ भेटिन्छ, त्यहीँ मार्ने’ धम्की दिँदै आएको मगरले बताउनु भयो । घटनाबारे नेपाल पत्रकार महासङ्घले साउन १८ गते विज्ञप्ति जारी गर्दै समाचारको विषयलाई लिएर पत्रकार उजिर मगरमाथि आएको ज्यान मार्ने धम्कीप्रति आपत्ति जनाएको छ । महासङ्घको विज्ञप्तिमा भनिएको छ, ‘समाचारप्रति चित्त नबुझे त्यस उपर कानुनी उपचार खोज्न सकिने प्रावधान र स्थापित पद्धति हुँदाहुँदै पत्रकारलाई ज्यान मार्ने धम्की दिनु र सामाजिक सञ्जालमा बदनाम गर्ने काम हुनु अत्यन्त निन्दनीय तथा प्रेस स्वतन्त्रताको ठाडो उल्लङ्घन हो ।’
समाचारप्रति चित्त नबुझे त्यस उपर कानुनी उपचार खोज्न सकिने प्रावधान र स्थापित पद्धति हुँदाहुँदै पत्रकारलाई ज्यान मार्ने धम्की दिनु र सामाजिक सञ्जालमा बदनाम गर्ने काम हुनु अत्यन्त निन्दनीय तथा प्रेस स्वतन्त्रताको ठाडो उल्लङ्घन भएको महासङ्घले जनाएको छ । पत्रकारलाई ज्यान मार्ने धम्की दिइएको घटनालाई गम्भीरता पूर्वक लिई दोषीमाथि कारबाही गर्न र पत्रकारको सुरक्षामा गम्भीर हुन सरकारसँग माग गरेको छ ।
