११ वर्षीया छोरीलाई विष खुवाई हत्या गरेको कसुरमा तनहुँ जिल्ला अदालतले पोखरा महानगरपालिका–२४ कास्कीकोटकी २९ वर्षीया सुष्मा विकलाई तीन वर्ष कैद र ३० हजार रुपियाँ जरिवाना सजाय तोकेको छ । जिल्ला अदादलका न्यायधिश हरिश्चन्द्र ढुङ्गानाको ०८० साउन १७ गतेको इजलासले सो मुद्दामा अन्तिम आदेश गर्दै सजाय निर्धारण गरेको जिल्ला अदालतका फाँटवाला सुन्दर तिवारीले जानकारी दिनु भयो ।
सुष्माले २०७७ माघ १९ गते दिउँसो आवुँखैरेनी गाउँपालिका–२ खानिखोला स्थित न्यु लिगलिग प्यालेस एण्ड लजमा बास बस्ने क्रममा छोरीलाई विष खुवाएर आफुले समेत विष सेवन गरेको अवस्थामा होटल सञ्चालकले भेटी तत्कालै उपचारको लागि चितवनको भरतपुर स्थित पुरानो मेडिकल कलेजमा लगेकोमा छोरी कुसुम विकको सोही दिन मृत्यु भएको थियो । सुष्माको भने उपचार पश्चात निको भएको थियो । सो घटनामा आरोपितका पति मनोज विकले २०७७ माघ २५ गते सुष्मा विरूद्ध जाहेरी दिएपछि सुष्मालाई प्रहरीले २०७८ साउन ३० गते गिरफ्तार गरेको थियो ।
सुस्मा विरुद्धमा जिल्ला सरकारी वकिल कार्यालयले २०७८ भदौ १६ गते जिल्ला अदालतमा हत्या सम्बन्धी मुद्दा दर्ता गरेको थियो । सुष्मालाई भदौ १८ गते देखी तनहुँ जिल्लामा पुर्पक्षको लागि कारागारमा राखिएको थियो ।
