प्रधानमन्त्री पुष्पकमल दाहाल ‘प्रचण्ड’ले संघीय शिक्षा ऐन मन्त्रिपरिषदबाट पारित गरेर मंगलबार संसदमा पठाउने तयारी भइरहेको बताएका छन्। समाजवादी विद्यार्थी मोर्चाले आज गरेको कार्यक्रममा बोल्दै प्रधानमन्त्री दाहालले भने, मंगलबारको मन्त्रिपरिषद बैठकबाट पहिलोचोटी संघीय शिक्षा ऐन पारित गरेर सदनमा पठाइँदैछ।’
‘म आज तपाईंहरुको अगाडि प्रधानमन्त्रीको हैसियतले भन्न चाहन्छु- पर्सि मंगलबार मन्त्रिपरिषद्को बैठकबाट पहिलो चोटि संघीय शिक्षा ऐन पारित गरेर सदनमा पठाइँदै छ,’ प्रधानमन्त्री प्रचण्डले भने, ‘शिक्षा, स्वास्थ्य, रोजगारी जस्ता विषयलाई जनताको मौलिक अधिकारको रुपमा लिपिवद्ध पनि गरिएको छ। मलाई लाग्छ, यो आफैँमा निकै गुणात्मक प्रकृतिको कदम हुनेछ।
यसले शिक्षा क्षेत्रमा अहिले देखा परेका थुप्रै समस्याहरूलाई सम्बोधन गर्ने तागत त्यो ऐनले राख्नेछ।’ ‘तत्कालीन प्रधानमन्त्रीले उच्च शिक्षा आयोगको प्रतिवेदन सार्वजनिक गर्न चाहनुभएन,’ उनले भने, ‘उहाँले त्यसलाई तकियामुनि राख्नुभयो। म प्रधानमन्त्री भएपछि खोजी भइरहेको छ। तत्कालीन शिक्षा मन्त्री गिरिराजमणि पोखरेलले पनि एक प्रति नराखी बुझाउनुभएको रहेछ।’फरक प्रसंगमा प्रधानमन्त्री दाहालले उच्च शिक्षा आयोगको प्रतिवेदन पनि सार्वजनिक नभएको बताए। तत्कालीन प्रधानमन्त्री केपी शर्मा ओलीले उक्त प्रतिवेदन सार्वजनिक नगरेको उनको भनाइ छ।
