बझाङको बित्थडचिर गाउँपालिका–७ स्यालढुङ्गाका पुट्के ओखेडाको घर भत्काएको आरोपमा प्रहरीले सोही ठाउँस्थित धामी गाउँका तीन जनालाई साउन ११ गते गिरफ्तार गरेको छ ।
जोशीबस्ती नजिक दलितले घर बनाउन पाइदैन भन्दै स्थानीय गैरदलितहरुको समूहले पुट्के ओखेडाको घर भत्काउनुका साथै मकैबाली काटेको उजुरी परेपछि बित्थडचिर गाउँपालिका–७ धामीगाउँका भवानी जोशी, कृष्ण जोशी र नन्दलाल जोशीलाई गिरफ्तार गरेको जिल्ला प्रहरी कार्यालय, बझाङका डिएसपी जागेश्वर भण्डारीले बताउनु भयो ।
पीडितले दिएको उजुरीका आधारमा आरोपितहरुलाई गिरफ्तार गरी अभद्र व्यवहार मुद्दामा अनुसन्धान भइरहेको समेत डिएसपी भण्डारीको भनाइ छ ।
पीडित पुट्के ओखेडाले स्थानीय गैरदलितहरुको ३० / ३२ जनाको सङ्ख्यामा आएका व्यक्तिहरुले गैरदलितबस्ती नजिक दलितले घर बनाउन पाइदैन भन्दै जातीय रुपमा गालिगलौज गरी घर भत्काउनुका साथै खेतमा लगाएको अन्नबाली समेत काटेर लगेको बताउनु भयो ।
स्थानीयहरुको एक समूहले पीडित पुट्के ओखेडाको निर्माणाधिन घरमा साउन १० गते तोडफोड गरी भत्ताएका थिए । हाल पीडित परिवार न्यायका लागि जिल्ला सदरमुकाम चैनपुरमा रहेका छन् ।
