पोेखरा महानगरपालिका वडा नं ७ मा आर्थिक वर्ष २०७९–०८० का लागि अघि सारिएका योजना समयमै सम्पन्न भएको बताइएको छ ।
वडाभित्र सञ्चालन गरिएका भौतिक संरचनाको निर्माण र वडा कार्यालयले प्रदान गरेको सेवाबारे जानकारी दिन विहीबार सार्वजनिक सुनुवाई कार्यक्रम आयोजना गरिएको थियो । वडा कार्यालय रत्नचोकमा आयोजित सुनुवाई कार्यक्रममा वडा अध्यक्ष राममोहन आचार्यले १ करोड ७३ लाख रुपैयाँको बजेट सीमाभित्र रहेर विभिन्न विकास निर्माण कार्य पूरा गरेको जानकारी दिनुभएको छ । वडामा चौतारीको संरक्षण तथा संवद्र्धन गरिएको, सडक विस्तार गरी स्तरोन्नति गरिएको,खानेपानी,फोहर व्यवस्थापन, बिजुली बत्ती,स्वास्थ्य, शिक्षा,कृषि,सुरक्षा लगायतका क्षेत्रमा वडाले आवश्यक सुधार गरेको अध्यक्ष आचार्यले जानकारी दिनुभएको छ ।
वडामा नयाँ जनप्रतिनिधि चुनिएर आएपछि सेवा प्रवाहमा पनि सुधार गरिएको उहाँको भनाइ छ । सार्वजनिक सुनुवाइमा २५ जना वडावासीले विभिन्न जिज्ञासा राखी सुझावसमेत दिएका थिए । वडावासीले असार अगावै विकास निर्माणका कामको थालनी गरी स्तरीय कार्य गर्न, छिमेकी वडासँग समन्वय गरी भौतिक निर्माण गर्न,वास्तविक कृषकलाई अनुदान दिन,बालबालिकाका लागि खेलमैदानको संरक्षण गर्न सुझाव दिएका थिए । वडाले दिने सेवा सुविधासम्बन्धी कार्य समयमै हुनुपर्ने भन्दै प्राविधिकहरुलाई जनमुखी र सेवामुखी हुनसमेत आग्रह गरिएको थियो ।
वडावासीले उठाएका विभिन्न सवालमा अध्यक्ष आचार्य र वडा सचिव राजेन्द्र पौडेलले जवाफ दिनुभएको थियो । कार्यक्रममा वडा सदस्य वसुन्धरा लामिछाने,सुनीता सुनार,अर्जुनबहादुर भुजेल(थापा),विष्ष्णुमणि बरालका साथै विभिन्न दलका पदाधिकारी,स्थानीय संघ संस्थाका प्रतिनिधि,शिक्षक,समाजसेवी,व्यापारी बुद्धिजीवीको उपस्थिति रहेको थियो ।
त्यस अवसरमा सार्वजनिक सुनुवाई कार्यक्रमको मिडिया पार्टनर रहेको न्यूज नेपाल टेलिभिजन र वडा कार्यालयको सहकार्यमा वडाले गरेका प्रगतिबारे तयार पारिएको वृत्तचित्र प्रदर्शन गरिएको थियो ।।
