अभियान हाम्रो डट कम
अल्चना श्रेष्ठ
नै प्रकृतिप्रेमीले
वर्णन गर्न लाग्दा-लाग्दै भुलेको
कुनै कविले
प्रियबिम्ब छान्दा-छान्दै छुटेको
भव्य अट्टालिकाको
आकर्षक गमलाभन्दा धेरै पर
सिङ्गै ऋतुचक्रको अर्धवृत्तमा
जीवनका सर्वाङ्ग आयामहरु
भोगचलन गरेर
हिउँदे सिरेटोको बर्फिला बयेलीसँगै
लहरी-लहरी
भुइँफूल झैँ मुस्कुराइरहने
तिमी मेरी बेथु म तिम्रो बेथुवा
कुनै,
गणितीय आयतनमा
सुन्दरता र कुरुपताको
धावनमार्ग निर्धारण गरेर
निर्धारित म्याराथन दौडिरहने
नयनहरु
सहजै अर्थिएको हो हाम्रो नजरमा
अभ्यस्त स्थूलदृष्टि
त्यसैले त,
म मा, न तिमीले-
कुनै दन्त्यकथाको राजकुमार खोज्यौ
तिमीमा, न मैँले-
गुलाफ खोजेँ , जून खोजेँ
नखोजेरै, नरोजेरै एकाकार
प्रेमिल-प्रेमिल हाम्रो सहयात्रा
औंलाले नङको छत पाए जस्तो
शिरले केशको ओत पाए जस्तो
कुनै अजर, अमर कृतिको
जीवन्त पात्र-पात्रा जस्तो
तिमी मेरी बेथु म तिम्रो बेथुवा
जहाँ,
उम्रौं , फैलौं, फक्रऔं
पहाड होस या तराई
न पिरल्यौं कुनै बुट्यान
न खोस्यौं कसैको स्वत्व
बरु, तप्काए बडा वृक्षले
हाम्रै माथि विषालु तप्केनी
हूलौ-हूल,
सलह आए, रित्त्याएर गए
र पनि,
न भयौं सिस्नु जस्तो
न भयौं नीम जस्तो
अन्योन्याश्रित हाम्रो मिठास
गुन्द्रुक जस्तो , ढिँडो जस्तो
थोरै-थोरै चटनी जस्तो
तिमी मेरी बेथु म तिम्रो बेथुवा
भएरै पनि नभए जस्तो
भूगोलकै नेत्रमा ओझेलिएर पनि
हुनु र नहुनुको आभाष दिलाई दिने
तिमी मेरी बेथु म तिम्रो बेथुवा
– सतिसाल , भरतपुर-११, चितवन
