राजनीतिक पहुँच र शक्तिको आडमा गाउँपालिका अध्यक्ष क्षेत्री हालसम्म कानुनी कारबाहीबाट जोगिन सफल भएका हुन्।
क्षेत्रीले एकवर्ष अघि गाउँपालिकाकै प्रशासनिक भवन निर्माण सम्पन्न भएबापतको भुक्तानी दिँदा सेवाग्राहीबाट ८ लाख रुपैयाँ घुस लिएको खुलेको थियो।
क्षेत्रीले घुस लिन लागेको गोप्य सूचनाको आधारमा अख्तियार दुरुपयोग अनुसन्धान आयोग केन्द्रीय कार्यालय टंगालको टोलिले धनुषाको क्षिरेश्वर नाथ नगरपालिकास्थित महेन्द्रनगरबाट पछ्याएको थियो।
गाउँपालिकाका सवारी चालक वीरबहादुर मगरले चलाएको प्र.२९०२९००१ झ ०००२ नम्बरको स्करपियो गाडीमा ८ लाख रुपैयाँ घुस लिएर भाग्दै गरेका गाउँपालिका अध्यक्ष क्षेत्री क्षिरेश्वरनाथ नगरपालिका ५ स्थित बाटो छेउमा फ्याकेर फरार भएका थिए।
सो क्रममा फालेको रकम ८ लाख र सवारी चालक वीरबहादुर मगरलाई वटेश्वर गाउँपालिका ४ बाट अख्तियारले नियन्त्रणमा लिएको थियो। अख्तियारले भोलिपल्टै प्रेस विज्ञप्ती जारी गर्दै सोको जानकारी गराएको थियो।
फरार गाउँपालिका अध्यक्ष क्षेत्री पावर र पहुँचकै सहारामा तीन महिना पश्चात अख्तियरमा हाजिर भएका थिए । राजनीतिक शक्तिकै आडमा उनलाई अख्तियारले जमानतमा छाडेको थियो। पावर र पहुँचकै कारण हालसम्म अख्तियारले उनीविरुद्ध मुद्दा दायर गर्न प्रमाण नपुगेको भन्दै कारबाही अगाडी बढाउन इन्कार गर्दै आएको छ।
अहिले फेरी नेकपा एमालेले धनुषाको बटेश्वर गाउँपालिकाको अध्यक्ष पदमा पुनः डम्बरबहादुर राउत क्षेत्रीलाई उम्मेदवार बनाएको छ। उनी हाल सोही गाउँपालिकाका अध्यक्ष हुन्। सोमबार बसेको एमाले गाउँ कमिटीको बैठकले पुनः उनैलाई सर्वसम्मत रुपमा उम्मेदवार बनाउने निर्णय गरेको हो।
भ्रष्टाचार काण्डमा मुछिए पनि क्षेत्री पुनः अध्यक्षको उम्मेदवार हुन सफल भएका हुन्। उम्मेदवारीका लागि हिरालाल महतो, श्याम महतो, दिलिप लामा, राम पुकार महतोलगायतले पनि दाबी गरेका थिए तर एमाले गाउँ सचिवालय समितिका बहुमत सदस्यले क्षेत्रीलाई नै रोजेपछि उनीहरू पछि हटेका हुन्।
