नेप्से निरन्तरजसो ओरालो लागेपछि धितोपत्रको दोस्रो बजारमा शेयर कारोबार सुस्ताउन थालेको छ। चैत २० गते आइतबार नेप्सेमा कुल १ अर्ब ४६ करोडको शेयर कारोबार भएको छ।
यो रकम पछिल्लो साढे १७ महिना यताकै न्यून हो। यस अघि २०७७ असोज २९ गते, बिहीबार नेप्सेमा १ अर्ब ४२ करोडको शेयर कारोबार भएको थियो। यस दिनको कारोबार रकम सोपश्चातकै न्यून हो।
साताको पहिलो कारोबार दिन नेप्से परिसूचक ३०.८९ अंक घटेर २५१३.४१ विन्दुमा झरेको छ। यस दिन सेन्सेटिभ इण्डेक्स ६.४४ अंक घटेको छ भने फ्लोट इण्डेक्स १.९३ अंक र सेन्सेटिभ फ्लोट इण्डेक्स १.६८ अंक घटेको छ।
यस दिन २२५ स्टकको २८ हजार ११३ पटकको कारोबारमा १ अर्ब ४६ करोड ७ लाख ७३ हजार रुपैयाँ बराबरको ३२ लाख ५३ हजार कित्ता शेयर खरिदबिक्री भएको छ। २२५ स्टकमध्ये यस दिन २९ स्टकको मात्र शेयरमूल्य बढेको छ भने १८८ स्टकको मूल्य घटेको छ। बाँकी ८ स्टकको मूल्य यस दिन स्थिर रहेको छ।
नेप्से ओरालो लागेपनि यस दिन तीन स्टकको मूल्य भने सकारात्मक सर्किट लेभलमा कारोबार भएको छ। यस दिन राष्ट्र उत्थान लघुवित्त, इमर्जिङ्ग नेपाल र नेष्डो समृद्ध लघुवित्तको शेयर सकारात्मक सर्किट लेभलमा कारोबार भएको हो। त्यसैगरी, यस दिन जाल्पा लघुवित्तको शेयरमूल्य ४ प्रतिशत बढेको छ। यस दिन युनाइटेड इदी मार्दी र सूर्या लाइफ इन्स्योरेन्सको शेयरमूल्य ५ प्रतिशतभन्दा बढी घटेको छ।
आइतबार १३ उपसमूहमध्ये अन्य उपसमूहको परिसूचक सर्वाधिक ३.१३ प्रतिशत घटेको छ। त्यसैगरी, यस दिन व्यापार, विकास बैंक, जलविद्युत, वित्त, निर्जीवन बीमा, लघुवित्त, जीवन बीमा र लगानी उपसमूहको परिसूचक १ प्रतिशतभन्दा बढी घटेको छ।
