कञ्चनपुर निर्वाचन क्षेत्र नम्बर–१ मा प्रगतिशील लोकतान्त्रिक पार्टी (प्रलोपा)का उम्मेदवार देपेन्द्रबहादुर शाहीले पार्टी परित्याग गर्दै नेपाल कम्युनिस्ट पार्टी (नेकपा)मा प्रवेश गरेका छन्। निर्वाचनको मुखमै उम्मेदवार नै पार्टी परिवर्तन गरेपछि कञ्चनपुर–१ को चुनावी समीकरणमा नयाँ मोड आएको छ।
शाहीसँगै प्रलोपाका कञ्चनपुर जिल्ला प्रमुख तथा केन्द्रीय सदस्य अमरसिंह विष्टसहित ५४ जना नेता–कार्यकर्ता पनि नेकपामा समाहित भएका छन्। शाही र विष्ट दुवै प्रलोपाका केन्द्रीय सदस्यसमेत रहेका थिए। उनीहरूको सामूहिक प्रवेशलाई नेकपाले महत्वपूर्ण राजनीतिक उपलब्धिका रूपमा लिएको छ।
गत १० फागुनमा बेलौरीमा पत्रकार सम्मेलन गरी आफ्नो चुनावी घोषणापत्र सार्वजनिक गरेका शाहीले त्यसको तीन दिनपछि नै पार्टी छाड्ने निर्णय गरेका हुन्। अल्प समयमै भएको यो निर्णयले स्थानीय राजनीति तरंगित बनेको छ।
नेकपामा प्रवेश गरेपछि शाहीसहितका नेता–कार्यकर्ताहरूले कञ्चनपुर–१ बाट उम्मेदवार रहेकी महिला नेतृ विना मगरलाई विजयी गराउने अभियानमा सक्रिय रूपमा खटिने प्रतिबद्धता व्यक्त गरेका छन्। उनीहरूले क्षेत्रको विकास, स्थिरता र वाम एकताको पक्षमा आफूहरूले यो निर्णय लिएको बताएका छन्।
उम्मेदवारकै पलायनपछि प्रलोपालाई यस क्षेत्रमा चुनावी चुनौती थपिएको विश्लेषण गरिएको छ भने नेकपाले भने विना मगरको पक्षमा जनसमर्थन अझ सुदृढ हुने दाबी गरेको छ। निर्वाचन नजिकिँदै जाँदा पार्टी परिवर्तन र नयाँ समीकरणले कञ्चनपुर–१ को प्रतिस्पर्धा थप रोचक बनेको छ।
