लामो समयपछि हिमाली जिल्ला साेलुखुम्बुमा आज उल्लेखनीय हिमपात भएको छ। जिल्लाको पत्ताले, टाप्टिङ लगायत खुम्बु पासाङ ल्हामु गाउँपालिकाका विभिन्न स्थानमा आज दिउँसो हिउँ परेपछि समग्र क्षेत्र सेताम्य बनेको छ।
यस वर्ष ढिलो गरी भएको हिमपातले स्थानीय किसानमा नयाँ आशा जगाएको छ। उच्च हिमाली क्षेत्रमा हुने हिउँले माटोको आर्द्रता कायम राख्ने, रोग–किरा नियन्त्रणमा सहयोग गर्ने तथा बाली उत्पादनका लागि अनुकूल वातावरण बनाउने अपेक्षा गरिएको छ। लामो खडेरी र असामान्य मौसमका कारण चिन्तित बनेका किसान अहिले उत्साहित बनेका छन् ।
पर्यटन व्यवसायीहरू पनि उत्तिकै उत्साहित छन्। पत्ताले र टाप्टिङ क्षेत्र हिउँ खेल्न तथा हिमाली दृश्यावलोकनका लागि चर्चित गन्तव्य मानिन्छन्। ताजा हिमपातसँगै आन्तरिक तथा बाह्य पर्यटकको आगमन बढ्न सक्ने व्यवसायीहरूको विश्वास छ।
स्थानीय प्रशासनले भने हिमपातका कारण चिसो बढेकाले आवश्यक सतर्कता अपनाउन आग्रह गरेको छ। ग्रामीण सडकहरू चिप्लो हुन सक्ने भएकाले यात्रा गर्दा सावधानी अपनाउन समेत अनुरोध गरेको छ।
हिमपातसँगै साेलुखुम्बुको पहाडी बस्तीहरू सेताम्य बनेका छन् भने सामाजिक सञ्जालमा हिउँसँग रमाइरहेका दृश्यहरू व्यापक रूपमा साझा भइरहेका छन्। लामो प्रतीक्षापछि परेको यस हिमपातले कृषि र पर्यटन दुवै क्षेत्रमा सकारात्मक प्रभाव पार्ने अपेक्षा गरिएको छ।
