पोखरा महानगरपालिका वडानं १३, आर्वा स्थित श्री अमरज्योति आधारभुत विद्यालय, अमलाचौरमा स्वर्ण जयन्तीको अवसर पारेर महायज्ञ गरिने भएको छ ।

   विद्यालयको ५०औं वार्षिकोत्सव एवं स्वर्ण जयन्तीको अवसर पारेर आज आयोजना गरिएको  बृहत्त भेलामा आगामी माघ १७ देखि २३ गते सम्म सातदिने महायज्ञ गर्ने निर्णय गरिएको हो ।  स्वर्ण महोत्सवका अवसरमा महायज्ञ सहित अन्य शैक्षिक, सामाजिक लगायत विविध कार्यक्रमहरु पनि गरिने विद्यालयका प्रधानाध्यापक बिमलबहादुर बरालले जानकारी दिए ।

  स्वर्ण महोत्सव तथा महायज्ञ कार्यक्रमलाई भब्य रूपमा मनाउन विद्यालय व्यवस्थापन समितिका अध्यक्ष कृष्णप्रसाद बराल संयोजक तथा प्रधानाध्यापक बिमलबहादुर बराल सदस्य सचिव रहेको एकसय नौं सदस्यिय मुल आयोजक समिति गठन गरिएको छ । मुल आयोजक समितिमा विद्यालय व्यवस्थापन समिति, शिक्षक अभिभावक संघ, विद्यालय व्यवस्थापन समितिका पूर्व अध्यक्षहरु, छिमेकी विद्यालय व्यवस्थापन समितिका अध्यक्षहरु, वडानं १३मा रहेका सबै टोल बिकाश संस्था, आमा समुह, युवा क्लव, मठमन्दिरका समितिहरु, शिक्षक, विद्यार्थी, भुपु विद्यार्थी, अभिवावक, शिक्षाप्रेमी , बुद्धिजिवीहरुको प्रतिनिधित्व रहने छ भने एक सचिवालय समिति पनि बनाईने छ ।

   स्वर्ण महोत्सव तथा महायज्ञ सफल पार्न  बिभिन्न उपसमितिहरु गठन गरी कार्य विभाजन गरिएको छ जसमध्ये अर्थ संकलनमा हरिबहादुर बराल , पूजा ब्यवस्थापनमा पदमराज बराल, पण्डीत व्यवस्थापनमा राजेन्द्रप्रसाद बराल, अतिथि सत्कारमा तारा बराल, प्रचार प्रसारमा श्रीराम सिग्देल,  सम्मान समन्वयमा ऋषीराम सिग्देल, सुरक्षा व्यवस्थापनमा रामबहादुर अधिकारी, युवा तथा भूपू विद्यार्थी समन्वयमा ई. प्रताप बराल, भजन वाध्यवादनमा महेन्द्रबहादुर बराल, सामाजिक सञ्जाल तथा विदेश विभाग समन्वयमा विजय कुँवर संयोजक रहेका बिभिन्न उपसमितिहरु पनि गठन गरिएका छन् ।

   २०३२ सालमा स्थापना भएको यो विद्यालयमा कक्षा पाँच सम्म पढाई भईरहेकोमा स्वर्ण महोत्सव पछी कक्षा आठ सम्म पुऱ्याउने लक्ष्य राखिएको छ । तेस्तै विद्यालयको शैक्षिक तथा भौतिक स्तर उकास्ने, विद्यालयमा स्वर्ण जयन्ती स्वागत द्वार निर्माण, सरास्वतीको मन्दिर बनाउनुका साथै खेलकुद मैदान स्तरोन्नती गर्ने पवित्र उद्देश्यहरु राखिएको छ ।