पोखरा
पोखराको लामाचौरमा हुन लागेको महिला तथा पुरुष आमन्त्रित राष्ट्रिय भलिबल प्रतियोगिताको प्रत्यक्ष प्रशारण पब्लिक फोरके टेलिभिजनले गर्ने भएको छ ।
भलिबल प्रतियोगिताको प्रत्यक्ष प्रशारण गर्ने गरी आयोजक नव आदर्श सामुदायिक समाजका अध्यक्ष स्वागतसिंह भण्डारी र पब्लिक फोरके टेलिभिजनका प्रबन्ध निर्देशक मन क्षेत्रीले मंगलबार सम्झौता पत्रमा हस्ताक्षर गरेका हुन् । टेलिभिजनबाट हुने प्रशारणले टाढा रहेका दर्शक समेत लाभान्वित हुने समाजका अध्यक्ष भण्डारीले बताए । भण्डारीले टिभिसँगको सहकार्यले प्रतियोगिताको महत्व झनै बढ्ने विश्वास व्यक्त गरे ।
प्रतियोगिता लामाचौरस्थित ईन्द्रराज्य लक्ष्मी माध्यमिक विद्यालयको परिसरमा भदौं १८ देखि २१ गतेसम्म सञ्चालन हुनेछ । जसमा पुरुष तथा महिला तर्फ करिब ५÷५ टिमको सहभागिताका लागी पत्राचार गरिएको समाजका प्रथम उपाध्यक्ष तथा सूचना तथा सञ्चार उपसमिति संयोजक दिनेश भण्डारीले जानकारी दिए ।
पुरुष र महिलातर्फको विजेता टोलीले समान १ लाख ५० हजार १ सय ११ रुपैयाँ प्राप्त गर्नेछन् । उपविजेताले १ लाख १ सय ११ र तेस्रोले ५० हजार १ सय ११ रुपैयाँ प्राप्त गर्न आयोजकले जनाएको छ ।
