दक्षिण कोरियास्थित एक ब्याटरी कारखानामा भीषण आगलागी हुँदा कम्तीमा २२ कामदारको मृत्यु भएको छ। मृतकमध्ये १८ जना चिनियाँ नागरिक भएको स्थानीय अग्निनियन्त्रण निकायले जनाएको छ। अरू आठ जना घाइते भएका छन्, जसमध्ये दुई जनाको अवस्था गम्भीर छ।
ह्वासङ सहरस्थित एरिसेल कम्पनीको कारखानामा सोमवार बिहान आगो लागेको थियो। उक्त कारखानाबाट लिथिअम ब्याटरी उत्पादन हुँदै आएको छ। सोलस्थित नेपाली दूतावासले उक्त घटनामा कुनै नेपाली नागरिकको संलग्नता नरहेको जानकारी दिएको छ।
“हामीले त्यसबारे बुझ्न दूतावासबाट कर्मचारी पठाएका छौँ,” नेपाली नियोगका उपप्रमुख पुष्पराज भट्टराईले बीबीसी न्यूज नेपालीलाई बताए।
स्थानीय टेलिभिजनमा प्रसारित दृश्यहरूमा अग्निनियन्त्रकहरूले आगो निभाउने प्रयास गर्दा ससाना विस्फोटन भएको देखिएको छ। दक्षिण कोरिया लिथिअम ब्याटरी उत्पादनमा अग्रणी मानिन्छ, जसको प्रयोग विद्युतीय सवारीसाधनदेखि ल्यापटपसम्ममा हुन्छ
