४ असार, काठमाडौं। नेपाली कांग्रेसका सांसद तेजुलाल चौधरीले बजेट विनियोजनमा पक्षपात गरेको आरोप लगाउँदै भौतिक पूर्वाधारमन्त्री रघुवीर महासेठको राजीनामा माग गरेका छन्।
प्रतिनिधिसभामा विनियोजन शीर्षकमा जारी छलफलमा भाग लिँदै सप्तरी-४ बाट निर्वाचित सांसद चौधरीले आफ्नो निर्वाचन क्षेत्रमा एक रुपैयाँ पनि बजेट छुट्याइएको छैन भन्दै भौतिकमन्त्रीको राजीनामा माग गरेका हुन्।
चौधरीले भने, “मेरो निर्वाचन क्षेत्र सप्तरी-४मा १ लाख त के ५० पैसा पनि बजेट विनियोजन भएको छैन। देशको समग्र भौतिक पूर्वाधारको जिम्मा नलिने मन्त्रीको के काम? त्यसकारण म भौतिकमन्त्रीको राजीनामा माग गर्दछु।”
चौधरीले भौतिकमन्त्रीसँग आफ्नो के दुस्मनी छ भनी प्रश्नसमेत गरे। जनकपुरको मन्त्री र बजेट लेख्नुपर्नेमा भौतिक पूर्वाधार लेखिएको भन्दै उनले रातो किताब फिर्ता गर्दै रोष्टममै छोडेर हिँडेका थिए।
