रौतहट— भारतीय प्रहरीको ‘मोस्ट वान्टेड’ सूचीमा रहेका एक भारतीय नागरिकलाई लुटपाटको आरोपमा रौतहट प्रहरीले पक्राउ गरेको छ। पक्राउ पर्नेमा बिहार राज्य मोतिहारी जिल्ला, पूर्वी चम्पारण थाना घोडासहन ग्राम पञ्चायत बसवरिया वडा २ का २० वर्षीय मोनुकुमार जैसवाल रहेको जिल्ला प्रहरी प्रवक्ता डीएसपी एलिजा गिरीले बताइन्।
गत जेठ २२ गते बिहान साढे १० बजे मौलापुर नगरपालिका ६ पथरा बुधराम स्थित सडक खण्डमा माँ बचत तथा ऋण सहकारी संस्थामा काम गर्ने बौधिमाई—८ का २४ वर्षीय अरबिन्द कुमार दासले १७ लाख रुपैयाँ झोलामा राखी राष्ट्रिय वाणिज्य बैंकमा जम्मा गर्न भारतीय नम्बरको मोटरसाइकलमा मौलापुर तर्फ जाँदै थिए। सोही क्रममा ३ जना अपरिचित व्यक्तिहरूले उक्त रकम लुटपाट गर्ने उद्देश्यले दासलाई पछाडिबाट गोली हानी फरार भएका थिए।
प्रहरीले अनुसन्धानको क्रममा घटनामा संलग्न अभियुक्तहरू सीमावर्ती भारत बिहार राज्य मोतिहारी जिल्ला पूर्वी चम्पारण घोडासहनमा सक्रिय बाबा ग्याङ नामक आपराधिक समूहसँग साँठगाँठ रहेको निष्कर्ष निकालेको थियो। यी व्यक्ति भारत र नेपालको सीमावर्ती इलाकामा लुटपाट र भारतीय सामानको तस्करीमा सक्रिय रहेको प्रहरीको अनुसन्धानबाट खुलेको छ।
गत २ गते साँझ साढे ५ बजे मौलापुर ७ स्थितबाट घरेलु कटुवा पेस्तोल १ थान, गोली २ राउन्डसहित भारतीय नागरिक जैसवाललाई पक्राउ गरिएको प्रहरीले जनाएको छ। जैसवालमाथि हातहतियार तथा खरखजना, चोरी तथा डाँका र ज्यान मार्ने उद्योग मुद्दामा रौतहट जिल्ला अदालतबाट म्याद थप गरी अनुसन्धान भइरहेको छ।
जैसवाल भारतीय प्रहरीको ‘मोस्ट वान्टेड’ सूचीमा रहेका छन्। मोतिहारी जिल्लाका एसपी कान्तेश कुमार मिश्रका अनुसार, जैसवालमाथि घोडासहन र झरौखर थानामा एक दर्जन भन्दा बढी आपराधिक मुद्दाहरू दर्ता छन्। उनिमाथि अवैध हतियार कारोबार, लुटपाट, अपहरण, र अवैध मदिरा ओसारपसार जस्ता मुद्दा रहेका छन्।
गत मार्च महिनामा जैसवालले अन्य केही साथीहरूसँग मिलेर भारतीय सीमा सुरक्षा बल जमुनिया क्याम्पका एक जवानमाथि आक्रमण गरेका थिए। उक्त घटनामा संलग्न अन्य अभियुक्त पक्राउ परे पनि मुख्य योजनाकार जैसवाल नेपालतर्फ भागेर जोगिएका थिए। जैसवाल केही समय अघि जेल जीवनसमेत बिताइसकेका छन्।
