जगन्नाथ गाउँपालिका–६ ओबावस्थित दलितबस्तीमा खानेपानीको अभाव भएको छ । ओबावस्थित दलितबस्तीमा खानेपानीको अभाव भएपछि स्थानीयहरु एक घण्टा पैदल हिँडेर खोलाको दूषित पानी ल्याएर पिउन बाध्य छन् ।
गाउँमा खानेपानीको अभाव भएपछि यस गाउँका ३५ घरपरिवारले खोलाको दूषित पानी पिउन पर्ने बाध्यता रहेको र खोलाको पानी बोकेर ल्याउन घण्टौँ समय लाग्ने गरेको जगन्नाथ गाउँपालिका–६ ओबावका स्थानीय काशीचन्द्र सार्कीले दुखेसो पोख्नु भयो ।
उहाँले भन्नु भयो– ‘खोलाको दूषित पानी पिउनु पर्दा गाउँघरमा झाडापखाला र रूघाखोकीका बिरामी बढ्दै गएका छन् । स्वास्थ्य संस्थामा उपचार गर्न जाँदा सफास्वच्छ पानी पिउनु पर्छ भन्नु हुन्छ । पानीको अभाव भएपछि स्थानीयहरु खोलाको पानी पिउन बाध्य छन् ।’
गत वर्ष आएको बाढीपहिरोका कारण गाउँमा प्रयोग गरिदै आएका पानीका मुहान पुरिएपछि यहाँका स्थानीयले खोलाको पानी पिउनु परेको हो । खोलाको पानी पिउन बाध्य भएपछि यस गाउँका अधिकांश स्थानीय झाडापखाला, आउँमासी, रुघाखोकीलगायतका बिभिन्न रोगले ग्रसित छन् ।
केही वर्ष पहिला वडा नम्बर ६ को चौगाड खोलाबाट गाउँमा खानेपानीको तीन ओटा धारा निर्माण गरिएको भए पनि गत वर्ष आएको बाढीपहिरोले ती सबै धारा भत्किएपछि अहिले गाउँमा खानेपानीको समस्या भएको ओबाव गाउँका स्थानीय हिउँकला सार्कीले गुनासो गर्नु भयो ।
उहाँले भन्नु भयो– ‘गाउँमा खानेपानी नभएकाले यहाँका महिलालाई घरको अन्य काम भन्दा बढि पानी बोक्नकै चिन्ता छ । ज्यान जोखिममा राखेर घण्टौँ हिडेर खोलाको पानी ल्याउनु पर्ने बाध्यता छ ।’
जिल्लाको दूरदराजका गाउँबस्तीमा अहिले पनि खानेपानीकै समस्या प्रमुख चुनौतीको रुपमा रहेको र यो समस्या समाधान गर्न गाउँपालिकाको बजेटबाट सम्भव नभएकाले बिभिन्न निकायसँग बजेटका लागि पहल गर्दै आइरहेको जगन्नाथ गाउँपालिकाका अध्यक्ष कालिबहादुर शाहीले बताउनु भयो ।
ओबावबस्ती नजिक खानेपानीको मुहान नभएको र यसबस्तीमा टाँढाबाट खानेपानीका पाइपहरु बिच्छाएर ल्याउनु पर्ने भएकोले बजेट व्यवस्थापन गरिदिन संघीय र प्रदेश सरकारसँग निरन्तर रुपमा अुनरोध गर्दै आएको अध्यक्ष शाहीको भनाइ छ ।
