मोरङको उर्लाबारीमा एक जना किशोरी अर्धचेत अवस्थामा भेटिएपछि प्रहरीले रिसोर्टका सञ्चालकलाई पक्राउ गरेको छ। उर्लाबारीमा डेरामा बस्दै आएकी १७ वर्षीया किशोरी उर्लाबारी नगरपालिका–४ आइतबारेस्थित नवराज भट्टराईको गाईगोठमा आइतबार बिहान अर्धचेत अवस्थामा भेटिएकी हुन्।
मिक्लाजुङ घर भएकी किशोरी अध्ययनका लागि उर्लाबारी मै कोठा भाडामा लिएर बस्दै आएको प्रहरीले जनाएको छ। स्थानीयले जानकारी दिएलगत्तै इलाका प्रहरी कार्यालय उर्लाबारीबाट खटिएको प्रहरीको टोलीले घटनास्थलमा पुगेर किशोरीको उद्धार गरेको थियो। उद्धार गर्दै उनलाई उपचार एवं स्वास्थ्य परीक्षणका लागि विराटनगर लगिएको छ।
प्रहरीको प्रारम्भिक अनुसन्धानबाट किशोरी बलात्कृत भएको खुलेको हो। मोरङ प्रहरीका प्रवक्ता डीएसपी रञ्जनकुमार दाहालका अनुसार बलात्कारपछि केही थाहा नपाउने अवस्थामा पुगेकी उनी गाईगोठमा पुगेकी थिइन्। त्यसअघि प्रलोभनमा पार्दै एउटा होटलमा लगेर बलात्कार गरेको खुलेको छ।
घटनामा उर्लाबारी–५ मिलनचोकका ४१ वर्षीय रविन गुरुङलाई पक्राउ गरिएको दाहालले बताए। गुरुङ उर्लाबारी–३ मा रहेको प्रार्थना रिट्रिट नामक रिसोर्टका सञ्चालक रहेको प्रहरीको भनाइ छ । किशोरीका अभिभावकले दिएको किटानी जाहेरीका आधारमा उनी पक्राउ परेका हुन्। गुरुङविरुद्ध जबरजस्ती करणी मुद्दा चलाउने प्रहरीको तयारी छ।
किशोरीलाई गुरुङले ललाइफकाइ प्रलोभनमा पारेर उर्लाबारी–४ स्थित कात्यायनी हेरिटेज होटलमा बलात्कार गरेको खुलेको डीएसपी दाहालको भनाइ छ। उनका अनुसार बलात्कारपछि किशोरी केही थाहा नपाउने भएकी थिइन्। पीडितको शरीरको बाहिरी भागमा भने कुनै चोटपटक देखिएको छैन।
उपचार सुरु गरेपछि अवस्था सामान्य बन्दै गएको दाहालले बताए। उनका अनुसार अहिलेसम्म घटनामा एकजनाको मात्रै संलग्नता देखिएको छ। अनुसन्धानबाट अरुको संलग्नता देखिए पक्राउ गरेर कारबाहीको दायरामा ल्याइने उनको भनाइ छ। घटनासँग सम्बन्धित अरु विषय अनुसन्धानपछि यकिन हुने जानकारी दाहालले दिए न्युजगृहले लेखेको छ ।
