गत वैशाख ११ गते हतारोमा धरहराको उद्घाटन गरे पनि धराहरा पुनर्निर्माणको काम अझै सकिएको छैन। ठेकेदार कम्पनीका अनुसार बाहिरी सुन्दरतासहितको पूर्ण धरहरा तयार हुन अझै ६ महिना लाग्छ। सिंगो आयोजनामध्ये ३० प्रतिशत काम बाँकी छ। ठेकेदार कम्पनी रमण निर्माण कम्पनीका प्रोजेक्ट म्यानेजर सञ्जय नकर्मीका अनुसार धरहरा स्तम्भकाे बाहिरी स्वरूप तयार भए पनि जमिनमुनि तथा भित्री संरचनाको अधिकांश काम अझै बाँकी छ।
ओलीले धराहरा स्तम्भ तयार नहुँदै उद्घाटन गरेपछि काममा बाधासमेत उत्पन्न भएको छ। ‘अझै धेरै काम बाँकी छ, एकपटक राखिएको लिफ्ट फेरि फुकाल्नुपर्याे, तीनतला भूमिगतको काम पनि बाँकी छ,’ उनले भने, ‘वरिपरि व्युटिफिकेसनको काम त झन् सुरु नै भएको छैन।’
हाल स्तम्भको भित्री बेसमेन्टमा टायल र ग्राइनेट लगाउने तथा सिलिङको काम भइरहेको छ। ‘हामीलाई पुस १० गतेसम्म सक्ने समय दिइएको छ, तर ६ महिना त लकडाउनले काम रोकियो, अझै धेरै बाँकी छ, सबैजसो काम सकिन वैशाखसम्म कुर्नपर्छ,’ प्रोजेक्ट म्यानेजर नकर्मीले भने।’
उनले पार्किङ र गार्डेनको काम नै सुरु नभएको बताए। उनका अनुसार धरहरा परिसरमा संग्रहालय, रंगीन जलफोहोरा, प्रदर्शनी, स्मारिका पसललगायत संरचना बनाउन बाँकी छ।
