माघ २,पोखरा

पोखरा महानगरपालिका वडा नम्बर १५ को आयोजनामा मंगलबारदेखि वडा १५ स्तरिय दोश्रो बृहत खेलकुद महोत्सव–२०८० शुरु भएको छ । संविधान सभा सदस्य विद्यादेवी भट्टराईले एक समारोहका विच महोत्सवको उद्घाटन गरिन् । सो अवसरमा उनले खेल क्षेत्रले नेपाललाई अन्र्तराष्ट्रिय क्षेत्रमा चिनाएको बताइन् । खेलाडीहरुको मेहनतकै कारण देशले खेलकुदका विभिन्न स्पर्धाहरुमा अन्र्तराष्ट्रिय पदक जितेको बताउँदै अब राष्ट्रले पनि खेलाडीको महत्व बुझ्नुपर्नेमा जोड दिइन् । वडास्तरम हुने यस्ता प्रतियोगिताबाट खेलाडी उत्पादन तथा नवप्रतिभाको पहिचान हुने भट्टराईको भनाई थियो ।

आयोजक वडा नम्बर १५ का अध्यक्ष तोरण बानियाँले वडावासीविच भाइचारा सम्बन्ध प्रगाढ पार्दै स्वस्थ्य नागरिक उत्पादनका वडाले खेलकुदका कार्यक्रमलाई प्राथमिकतामा राखेको जनाए । आगामी वर्षहरुमा यो कार्यक्रमलाई अझै बृहत्तर रुपमा आयोजना गरिने बानियाँले औंल्याए । महोत्सवमा सहभागिताका लागि वडावासीले देखाएको उत्साहले आफुहरुलाई झनै हौसला र उर्जा प्राप्त भएको बानियाँले बताए ।

प्रतियोगिता संयोजक समेत रहेका वडा सदस्य आशिष भण्डारीले गत संस्करणको खेलकुद महोत्सवमा सहभागि भएको खेलाडीहरुले पोखरामा आयोजना भएका विभिन्न प्रतियोगिताहरुमा उपाधि जित्दै वडाको गौरब बढाएको जनाए । बन विज्ञान अध्यायन संस्थान भित्रको मैदानमा शुरु प्रतियोगिताको उद्घाटन समारोह वडा सदस्य मन्दिरा परियारले कार्यक्रम सञ्चालन गरेकि थिइन् ।

त्यसअघि वडा १५ भित्र रहेका झण्डै ढेड दर्जन संघसंस्थाले खेल मैदानमा मार्च पास गरेका थिए । तीन दिने खेलकुद महोत्सवमा खुल्ला फुटबल, विद्यालय स्तरिय फुटबल, महिला तथा पुरुष भलिबल, बास्केट बल, महिला तथा पुरुष दौड, व्याडमिण्टन, रस्साकसी लगायत विभिन्न खेलहरुका झण्डै १२ सय खेलाडीले भाग लिएका छन् ।