जजरागाउँ मावि शिक्षक अभिभावक संघका अध्यक्ष घोराही उपमनपा–१८ का ४५ वर्षीय शिवराज केसीको हत्या गरेको आरोपमा प्रहरीले बंगलाचुली गाउँपालिका–४ का ४३ वर्षीय शेरबहादुर कवर मगर, उनकी पत्नी ३५ वर्षीया दीपा कवर मगर, सोही गाउँपालिका–१ का २९ वर्षीय तिलक पुन र ४५ वर्षीय मेघराज कवर मगरलाई पुस १५ गते गिरफ्तार गरेको छ ।
केसीलाई भेटघाटका लागि बोलाएर भरुवा बन्दुकले गोली प्रहार गरी पुस ८ गते हत्या गरी बंगलाचुली गाउँपालिका–४ को भुमेबरा सामुदायिक वनस्थित कोइलाखानी भित्र लुकाइएको अवस्थामा प्रहरीले पुस १३ गते शव फेला पारेको थियो ।
केसीलाई भेट्न बोलाएकी दीपा, उनका पति शेरबहादुर, भाई तिलक पुस ९ गते भागेर भारत पुगेपछि हत्या गरेको आशंकामा पीडित परिवारले पुस १० गते जिल्ला प्रहरी कार्यालयमा उजुरी दिएका थिए ।
प्रहरीले आरोपितहरू तीन जनलाई दिल्लीबाट र बन्दुक दिएर सहयोग गर्ने मेघराजलाई घरबाट पुस १५ गते गिरफ्तार गरी अनुसन्धान थालेको जिल्ला प्रहरी कार्यालयका डिएसपी जनकबहादुर मल्लले बताउनु भयो ।
शवको पोष्टमार्टम पुस १६ गते राप्ती उप क्षेत्रीय अस्पताल घोराहीमा गरिएको थियो ।
घटनाबारे प्रहरीले पुस १८ गते पत्रकार सम्मेलन गरी आरोपितहरुलाई सार्वजनिक गर्दै अनुसन्धान थालिएको बताएको छ ।
