दार्चुलाको झुलाघाटदेखि मध्यपहाडी लोकमार्गले छोएका जिल्ला र क्षेत्र भएर सुदूर पूर्वको चिवाभन्ज्याङसम्मको संकल्प यात्रामा रहेको नेकपा एमालेले कोशी प्रदेश प्रवेश गर्नुअघि पहिचानवादी समूहलाई अवरोध नगर्न अपिल गरेको छ । प्रदेशको नामकरणका विषयमा एमालेसँग चिढिएका पहिचान पक्षधरहरूले प्रदेशको नामकरणपछि एमालेका कार्यक्रम र नेताहरूको उपस्थितिलाई प्रतिरोध गर्दै आएका छन् भने पटक-पटक झडप र आक्रमणको प्रयासका घटनासमेत भएका छन्
यसपटक १४ मंसिरदेखि पूर्व-पश्चिम यात्रामा रहेको एमालेले अध्यक्ष केपी शर्मा ओलीसहित शीर्ष नेताहरुको सहभागितामा कोशीका खोटाङ, भोजपुर, धनकुटा, तेह्रथुम, पाँचथर र चिवा भन्ज्याङसम्म पुगेर काठमाडौं फर्किने कार्यक्रम छ । अध्यक्ष ओलीले खोटाङको हर्कपुर, तेह्रथुमको वसन्तपुर र पाँचथरको फिदिममा हुने सभालाई सम्बोधन गर्ने कार्यक्रम छ । तर पहिचानवादी समूहले एमालेको कार्यक्रमलाई अवरोध गर्ने घोषणा गरेपछि एमालेले कोशी प्रवेश गर्नुअघि नै सार्वजनिक अपिल गर्दै मुलुकको समृद्धि र विकासको उदेश्यले गरिएको संकल्प यात्रामा अवरोध नगर्न अपिल गरेको हो ।
एमाले प्रचार विभाग प्रमुख राजेन्द्र गौतमले एमालेको अभियानमा कुनै अवरोध पुर्याउने काम नगर्न सार्वजनिक अपिल गरेका छन् । ‘एमालेको संकल्प यात्रा घुर्मी भएर कोशी प्रदेश प्रवेश गर्दैछ। यसक्रममा केही समूहहरूद्वारा हाम्रो अभियानलाई अवरोध गर्ने गरी सडक बन्द, प्रदेश बन्दलगायतका बन्द र अवरोधका कार्यक्रमहरू सार्वजनिक गरिएको सुनिन आएको छ। त्यसका निम्ति पार्टीका तर्फबाट औपचारिक रूपमा सबै समूहहरू, पहिचानवादी समूहलगायतका सबैलाई अभियानलाई अवरोध नगर्न बन्द नगर्न, अभियानमा सहयोग पुर्याउनका निम्ति अपिल गर्न चाहन्छु,’ प्रचार विभाग प्रमुख गौतमले भिडियो सन्देशमार्फत भनेका छन् ।
