~बिकास लुङ्गेली
उ हरेक सिजन सिजनमा
फरक फरक वस्तु बेच्छ
हरेक ठाउँ ठाउँमा पुग्छ
सबैलाई आकर्षित गर्छ
किनकी उ ब्यापारी हो
बजारमा जे बिक्छ
उ त्यही बेच्न आउँछ
कहिले
मार्क्सवाद लेनिनवाद लिएर आउँछ
कहिले प्रजातन्त्र र समाजवाद
कहिले सिङ जुधाएर आउँछ
कहिले काँध मिलाएर आउँछ
जे होस आउन लाई आउँछ
उसैले बेचेको हो यो शहरमा
सहिद गंगालाल र दशरथ को सपना
दिल बहादुर रम्तेल र सेतु बिकको कहानी
निरन्तर बिकिरहेकैछ
पुष्पलाल र मदन आश्रीतको सपना
बिपि देखि जीपी सम्मको योजना
आज फेरि उ कराउँदै आयो
सिलौटको श्रीपेज हातमा बोकेर
एउटा औंला आकाशतिर देखाउँदै
सेतो भनेको हिरा
हिरा भनेको समृद्धि
समृद्धि भनेको म
अब तिम्रो दुखका दिन गए
अब यो देश म बनाउँछु
म जे गर्छु त्यो नगर्नु
म जे भन्छु त्यहि गर्नु
मान्छे जस्तो देखिने भिडले
पररररररर ताली बजायो!
